ZPM Leader Lalduhoma chuan, “Party ṭhenkhatten ‘Sem Policy’ an tlinpui ṭhin tih hi ZPM hruaitute leh member-te hian kan hai hauh lova. Ti ve mai tura nawrna pawh kan tawk fo ṭhin. Pathian zarah chu thlêmna chu tun thleng hian kan la do zo va, kan do zel dawn a ni,” a ti.
ZPM Party-in nimina an party office hawnna hun an hmannaah he thu hi sawiin, Lalduhoma chuan ‘Sem Policy’ in ram a tihchhiat tawhzia sawiin, hruaitu hmasa Ch.Chhunga leh Brig.T.Sailo te chuan ‘Sem Policy’ an sawi ri ve ngai lo tih sawiin, ‘Sem Policy’ tichhuaktu chu Congress Party an ni a ti a, kum 1989-1998 thleng, term 2 chhung NLUP hnuaiah Rs.30,000 sem an rawn zuar a. Sem Policy chu Congress-in term 2 ngawt an tlinpui nia hriain, MNF chuan kum 1998 inthlanah khan, MIP hnuaiah Congress Rs.30,000 chu Rs.50,000-in an rawn lân ta a. Kum 2008 thlengin term 2 bawk an sawrkarpui ve leh a. Kum 2008 inthlanah Congress chuan MNF Rs.50,000 chu cheng nuai 1-in an rawn lân leh a. NLUP chu NEDP tia thlak chhoin, kum 2018 thleng, term 2 bawk an sawrkarpui veleh a. Kum 2018 inthlanah Congress cheng nuai 1 chu MNF chuan SEDP hnuaiah nuai 3-in an rawn lân ve leh ta a ni, a ti.
Lalduhoma chuan, “Sem Policy hnuaiah hian kum 34 lai kan lo awm dawn ta. Congress-in vawi 4 an tlinpui tawh a, MNF-in vawi 3 an tlinpui tawh bawk. Heng party pahnihte hian an mihring puite ngei chu ran leh bungrua ang maiin min lilam a, a chhâng huai zawk apiang an tlin zel avangin an zawngchhang a, an inlan chho zel a, a ngawl an vei tawh a, an sim thei tawh lo a nih hi. First Instalment dawngin a dawt leh an thlir a, la dawng lo ten dawn ve hun an nghak a. Valambawk ûm ang maiin min siam a, an intiam ang dawn ni erawh a her chhuak ngai si lo. He ‘Politik Aiâwt’-ah hian piantharna da thakin min tântir a, patling zet mahni leh mahni pawh inthurual hleithei lovin, mahni zalenna leh duhthlanna te pawh hmang ngam lovin min siam a. Development sum vote zawn nana hmang duh hruaitu hei chen kan hrawn hi a vanduaithlak takzet a ni.‘Sem Policy’ hi kan rilru leh thlarau thlenga piansualtirtu, Kohhran tinin an do leh Bible zirtirna kalh tlat a ni,” a ti bawk.
ZPM Leader chuan, “Dikna, huaisenna, tumruhna, taihmakna leh thawhrimna chauh hi kan dinchhuahna tur chu a ni. Chutiang mite chu Hand Holding Policy hmangin, an bânah kaiin, mahni kea ding thei turin kan siam ang. Kan Policy – “Kalphung Thar, Mipui Sorkar” hi kan tlûkpui ngam a, kan dinpui ngam bawk a ni,” a ti.