MNF Party Vice President, Lalthlengliana chuan “Serchhip bialah by-election kan nei leh dawn a. Mipui khawngaih hlawh tuma insawi khawngaihthlak chawp an awm mek a. Keini chuan kan hnathawh tur kan sawi ang. He by election-ah pawh hian kan chak leh ngei dâwn,” a ti.
Nimina kum 2021 atana Mizo Hnam Run, Aizawl hawnna inkhawmah he thu hi sawiin, Lalthlengliana chuan “February thlaah AMC kan inthlang leh dawn a, Local Council-ah 83% latute kan ni a. Candidate la puan ni lo mahse green signal pek vek tawh an ni. An ṭha ṭheh ṭhawh hle a, AMC-ah pawh kan sawrkar leh dawn a ni,” a ti bawk.
“He hrileng karah hian Pathian Malsawm tlakin Mizoram sawrkarin hna a thawk a, opposition party-te pawhin Covid do nan an theihtawp an chhuah tlâng a. An chungah lawmthu kan sawi a ni. India ram hian Covid-19 dona kawnga thawk ṭha ber state thlang dawn sela Mizoram chu India ramah No 1 kan ni ngei ang. Covid vanga thi pawh kan tlêm fâl hle rih a ni,” a ti a.
“Harsatna karah pawh buhfai tlachham miah lovin kan la awm zel a nih hi. Kan CM ka fakna em em chu India ram hmun dangah CM Relief Fund hi midang kutah an dah ngai lova, kan CM chuan Board dinin chumite kutah chuan transparent takin kalpui a lo ni ta a. CYMA leh kohhrante, NGO dangte telna a ni a. A tirah a hman dan chungchang zawhna awm neuh neuh mahse, tunah chuan sawi leh zawt peih pawh an awm ta lo.. Hetianga CMRF phalrai Chief Minister hi India ramah kan CM lo chu pakhatmah an awm lo,” a ti bawk.
K.Vanlalauva, MNF Treasurer pawhin thu sawiin, Kan CM leh Minister-ten Video Conferencing an neih thu kan hre fo. Heng kar lakah hian Project ṭhahnem tak an thehlut reng a ni tih i hria ang u. Anni hi Pathianin kan hmalama mit a siam ang chiaha sawrkar tana hmalama pen zelte an ni,” a ti.