Serchhipa Republic Day hman dan tur ngaihtuahin thukhawm

Nimin khan Serchhip DC Conference Hall-ah District Bawrhsap, Kumar Abhishek, IAS hovin January ni 26-a lo thleng tur Republic Day, 2021 hman dan tur sawiho a ni.

District Bawrhsap chuan Republic Day hlawhtling taka hman a nih theih nana uluk taka ngaihtuahna seng tur leh mawhphurhna an pêkte ṭha taka hlen tum ṭheuh turin kalkhawmte a ngen a ni.

Meeting-a rel a nih dan chuan a lawmna pui ber hi DC Office tualah zing dar 11-ah neih tura rel a ni a, Deputy Commissioner chu khuallian atana beisei niin, department hotute leh sawm bikten he hun hi an hmang dawn a, mipuiin an lo chhim ve theih nan Cable TV hmangin programme pumpui hi tihchhuah tur a ni dawn bawk a, mawhphurtu tur leh chanvo neitute pawh ruatfel nghal a ni.

Ruahman dan chuan Republic Day denchhenin kum danga an lo tih ṭhin tawh angin Day pual thilpek Home leh Hospital hrang hrangah te pek a ni ang a, a niah hian ni chhuah rualin Office tinah hnam puanzar zar a ni ang a, VIP at Home programme erawh neih a ni lo thung ang.