April-ah HSLC leh HSSLC Exam neih a ni dawn:Education Minister

Education Minister Lalchhandama Ralte chuan HSLC leh HSSLC Board Examination chu April 2021-ah neih a ni ang a, HSLC result chu June chawlhkar hmasa berah tihchhuah a ni ang a, June chawlhkar hnihnaah HSSLC result tihchhuah tum a nih thu a sawi.

Nimina Aizawl Edenthar Comprehensive High School a hawnnaah School Education Minister hian he thu hi a sawi a, Minister chuan pawl I-XI-te chu an pawl sawn ngawt lovin Bridge course siam tum a ni, a ti a. Covid-19 hrileng chu zirnain a tuar nasa ber tih sawiin, zirlaiten sikul kal an châk tawh a, zirtirtuten naupang zirtir hna chhunzawm ṭul an ti tawh em em bawk a, private school-ten an tuar hle bawk a ni a ti a. Hripui avang hian zirlaiten an thiam tur ang an thiam lovang tih sawrkarin a hlau a, a theih ang angin online hmang te, TV leh a theih ang ang hmanrua hmangin zirtirna hna kalpui mek a ni, a ti a, hengte hi nu leh pate pawhin an fate tan ngaih-sakpui zel se a duh thu a sawi.

Minister chuan khawtlang-in hma a sawn dawn chuan zirna a bul tan leh hei hi number one-ah dah a ngai, a ti a, khaw-tlang hruaitute hian infiamna mual chauh thlir lovin, zirna an dah pawimawh zel hi veng hma-sawnna tak tak tur a ni, tiin, zirna lama thawktute thawhpui leh ṭanrual a pawimawh zia a tarlang.

Khualzahawm C.Lalmuan-puia, MLA, Aizawl North III pawhin thusawiin sawrkarin kawng hrang hrangin zirna lama hma sawn nan a thawk mek a, All India Service leh Central Service-a ṭhalaite an luh theih dan tur pawh sawrkarin kawng a zawng zel a, ṭhalai tumruh leh lehkha-thiam chhawm chhoh turte pawh MYC-in an thlang fel tih sawiin sawrkarin zirna lama a thawh chu ram tan kawngro su tak tur a nih thu a sawi.

He hunah hian School Education Director James Lalrinchhana, Lalhmachhuana SPD Samagra Shiksha bakah officer ṭhenkhat te, khawtlang hruaitute leh Mizoram Teacher Federation hruaitu te leh school-a thawk te an tel a ni.

Leave a Reply

This site uses Akismet to reduce spam. Learn how your comment data is processed.