Home Ministry thuchhuah vangin lungawi lohna lantir dawn

Government of India, Ministry of Home Affairs in unau Myanmar aṭanga lo kal turte man chhuak a, thawn haw tura a ti chu ZORO chuan na an ti hle tih an sawi a, hemi dodalna leh duhlohna lantir nan ni 23 March 2021(Thawhlehni) khian Sit-In-Protest neih nise tiin a rel.

Nimin khan ZORO General Headquarters executive committee meeting chu an president R.Sangkawia kaihruaiin an nei a, meetingah hian Government of India, Ministry of Home Affairs in Mizoram, Nagaland, Arunachal Pradesh leh Manipur Chief Secretary tinte leh DG Assam Rifles hnena lehkha a thawn, Myanmar aṭanga dân loa lo lutte man chhuaka a rang thei ang bera thawnlet tura a tih chungchang hi an sawiho a.

ZORO meeting chuan Government of India, Ministry of Home Affairs -in Myanmar ram chhunga awm Zohnahthlakte, sahimna zawnga lo lut turte ngai thei loa hetianga order a lo chhuah ta hi ṭha lo an tih thu sawiin, he a thuchhuah hi a rang thei ang bera sut lehnghal tura an duh thu an sawi a, ZORO chu khawvel hmun hrang hranga awm Zofate kan insuihkhawm a, rorelna pakhat hnuaia kan awm theih nana beitute an nih angin Myanmar Zohnahthlak awmte thlavang chu an hauh zel dawn tih sawiin, Myanmar-a Zohnahthlak awmte pawh lo thlaphang lo turin a chah a, puih an ngaihna apiangah an pui zel dawn tih an tarlang a ni.

Lung awih lohna an lantirna hunah hian Government of India, Ministry of Home Affairs lehkha copy hi an hal dawn a, ZORO chuan Sit-in Protest a neihnaah Mizo mipui a tam thei ang ber kal turin an sawm a, Myanmar-a Zohnahthlak mangang lo ṭanpui a, lo buaipuitu mimal leh pawl zawng zawngte chungah lawmthu an sawi a, a bik takin MZP-ten tha leh sum ṭhahnem tak senga an lo buaipui chu lawmawm an tih thu sawiin, MZP ten Zohnahthlakte tana hma an lo lak tawhna chu kan chhuang hle tih an sawi bawk.

Leave a Reply

This site uses Akismet to reduce spam. Learn how your comment data is processed.