MP(RS)-in Parliament-ah India sawrkarin thupek Mizo mipuiten an hrethiam dawn lo tih a sawi

Parliament Session kal mekah nimin khan Mizoram Rajya Sabha MP K.Vanlalvena chuan Zero Hour-ah thu sawiin, Myanmar ram buaina avanga Mizorama raltlante chungchang a sawi chhuak a, Myanmar aṭanga lo tlanchhiate lo dangkir tura India sawrkar-in a ti chu Mizo mipui-te chuan an hrethiam dawn lo tih a sawi.

K.Vanlalvena chuan Myanmar ramah democracy tungding a, mihring dikna leh chanvo humhim tura beitu te chungah rawng taka sipaite chetna avanga Mizoram lama rawn tlan chhia mi 300 chuang an awm thu House ah hian sawi chhuakin hemi zinga 150 vel zet chu Myanmar police a thawkte an ni a ti a, heng mite hi Mizoram sawrkar leh Mizo mipui, pawl hrang hrangten lo kuangkuahin sawrkar laipui hriatpui lohvin an lo ṭanpui a ni, a ti a.

Hetihlai hian Ministry of Home Affairs chuan Myan-mar ramri depa awm hmar-chhak state 4 Chief Secretaries te chu Myanmar aṭanga lo tlanchhiate lo dawngsawng lo tura rawn hriattirin, ramria duty Assam Rifles-te chu Myanmar lam aṭanga ramri kana lo tlanchhe turte lo dangkir turin a hriattir bawk a.

Myanmar aṭanga lo tlanchhiate lo dangkir tura India sawrkar-in a ti hi Mizo mipui-te chuan an hrethiam dawn lo tih sawiin, K.Vanlalvena chuan Myanmar aṭanga lo tlanchhiate chu Mizote hnampui, Mizo chi leh kuangte an ni a, tihhlum tur atana thawnkir chu mihring nihna aṭanga ngaihtuah pawhin thil tihchi a ni lo, a ti a. Myanmar ram buaina a ziaawm a, boruak a ralmuan hma loh chuan inthawnkir chi a ni rih lo, tiin India ram chu khawvela democracy ram lian ber a nih angin mipui rorelna democracy tung ding tura beihna reng reng chu thlâwp leh ṭanpui hi India ramin a tihâwm tak a ni, tiin House ah hian a sawi a.

Khawvel pumin heng Myanmar raltlante hi lo hum tura India mipuite min beisei laiin Ministry of Home Affairs hian Myanmar raltlan te chungchang hi ngun taka ngaihtuahin a kalphung thlak danglam se, tiiin House-ah hian a ngen nghal a ni.

Leave a Reply

This site uses Akismet to reduce spam. Learn how your comment data is processed.