Khawnvartui dahlêt

Tun hnaia Serchhipa sem tur Khawnvartui (K.Oil) dah kim loh rulhna tur chu nimin (18.3.2021) khan khawnvartui phurtu driver chuan a intiam angin khawnvartui litre 2180 chu Serchhipah a rawn thlenpui.

Tarlan tawh ṭhin angin February ni 16, 2021 khan Serchhip-a K.Oil dealer pathumte sem tur Khawnvartui chu Serchhip rawn phurh thlen a ni a, K.Oil dealer-te hian an khawnvartui chan ai tur chu kiam deuha an hriat avangin Legal Metrology leh Serchhip District Consumer Association hruaitute hnenah enfiah sak turin an ngen a, hetah hian Khawnvartui a kim lo tih hriat chhuah a ni a, khawnvartui phurtu Driver chuan Serchhip DCSO hriatpuinaa hralh niin a insawi a, hemi hnu hian Driver vek hian Serchhip DCSO hriatpuinaa a hralh nia a sawi chu dawt a sawi nia tarlangin thupha chawina a siam a, khawnvartui a dah kim loh zawng zawng pawh chu ni 20.3.2021 aia tlai lovah dahkim leh a intiam a, a intiam ang hian nimin khan Khawnvartui hi a rawn dah lêt leh a, khawnvartuite hi Retailer-1-ah dah vek niin, a sem dan tur hi Serchhip District Consumer Association-ten a mamawh tak tak tena an chan theih nan ruahmanna an la siam dawn niin thudawnna chuan a sawi.