Election Commission of India chuan nimin khan state hrang hranga MLA leh MP by-election neih hun tur a puang a, heng by-election neih rualin hian Serchhip bial MLA by-election pawh neih a ni dawn a, April ni 17, 2021 (Inrinni) chu inthlan ni atan ruat a ni a, vote tla te hi May ni 2, 2021 (Pathianni)-ah chhiar a ni ang.
Nimina ECI-in by-election neih hun tur a puante hi state hrang hranga Assembly Constituency 14 leh Parliamentary Constituency 2 an ni a, ECI thuchhuah tarlan dan chuan March ni 23, 2021-ah inthlan hriattirna tihchhuah a ni ang a, March ni 30, 2021 thleng inthlan chuh tumte tan hming thehluh hun hawn a ni ang a, March ni 31-ah nomination endik niin, April ni 4 thleng inhnukdawk duhte tan inhnuhdawh hun hawn a ni ang a, April ni 17-ah inthlanna hi neih niin, May ni 2, 2021-ah vote chhiar a ni ang a, May ni 4, 2021-ah inthlan kaihhnawih thil zawng zawng chinfel vek tur a ni dawn a ni.
Heng inthlan neihna turah hian January ni 1, 2021 behchhana electoral roll siam behchhan tur niin, polling station zawng zawngah EVM leh VVPAT hman tur a ni tih ECI chuan a tarlang a, model code of conduct pawh heng by-election neihna tur constituency awmna district-ah hian puan nghal niin, model code of conduct hian Candidte zawng zawng, political party leh state sawrkar bakah sawrkar laipui pawh a huam nghal dawn tih a tarlang bawk.
Covid-19 hri leng darh zel lohna atana ECI-n August ni 21, 2020-a inkaihhruaina a siam tawh chu inthlannaah hian khauh taka kalpui tur a ni tih a tarlang bawk a ni.
Hetihlai hian Serchhip bial by-election neih tura din tumte chuan campaign an bei ngawrh chho telh telh a, tun dinhmunah by-election-a din tum hi mi 5 an awm tawh a, heng zinga pathum, ZPM candidate Lalduhoma, Congress candidate PC Laltlansanga, MNF candidate Vanlalzawma bakah Independent-a din tum Ramhlun Eden-a te chu by-election-ah hian an ding dawn tih a chiang tawh a, by-election chuh tum PC party candidate an neih dawn thu leh an caididate tur pawh an ruat fel tawh thu an sawi a, inthlan puan hunah an party candidate tur hi puan chhuah an tum a, BJP pawhin Lalhriatrenga Chhangte chu dintir an tum ve bawk a ni.