Mizo Students’ Union (MSU) General Headquarters, Aizâwl chuan nimin khan Mizoram Rural Bank (MRB) Chairman V.Jaya Chandra hnênah probation hun chhûnga Local Language Proficiency Test paltlang zo lo Office Assistant parukte chawlhtir tura ngenna an thlen.
Nimina MSU thuchhuah tarlan danin, Institute of Banking Personnel Selection (IBPS) kaltlanga MRB-a thawk tûr lâk chung-chângah probation hun chhûnga Local Language Proficiency Test paltlang zo lo Office Assistant paruk – Chandan Choudhury, Kâwlkulh; Shailesh Kumar Singh, Champhai; Rishabh Raj, Marpara; Amibatha Nath, Kânhmun; Amit Kumar, Ngopa leh Sumit Kumar, Sangau hmuna thawk mêkte chu Regional Rural Banks Rules 2010-in a phal chin thla 18 aia tam hna an thawh avâng leh Mizo ṭawng pâwl riat (8) thiamna tlukpui certificate an la neih theih loh avângin nimin khan MRB Chairman hnênah hian chawlhtîr thuai tûrin ngenna a thlen tih an tarlang a, vawiin aṭangin heng mi parukte hi an hna zawm tawh lo turin an hriattir tih an sawi a, an ngenna hnuhnûng ber zâwm lote chungah eng pawh thleng se MSU-in mawh a phur lo vang an ti bawk.
MSU chuan hnamdang eng emaw zâtin Local Language Proficiency Test buatsaih chu a fel fai tâwk lo tia dâwta puhin SBI Corporate Centre, Mumbai lamah hêkna an theh lût tih hriat chhuah a ni tih an tarlang a, MSU chuan Mizoram Sawrkâr hnênah hêng hnamdang MRB Management hêktute tân hian Test dang buatsaih tawh lo turin a ngên nghâl a, MRB chu Mizoram tâna Bank a nih ang ngeiin Mizo mipui tâna rin tlâk leh rin ngama a kal zêl chu a duh tak zet tih an sawi a, MRB Chairman leh General Manager pawh dânin a sawi ang ngeia hna thawk tûr leh hnam anga thlei bîk nei lova hma la thuai tûrin an phût tih an sawi a, MRB-ah hian a ram leilung fa a tam thei ang ber an thawh theih nân hma a la zêl dâwn a, Mizo zirlai leh mipuite thlâwpna a ngên tih an tarlang bawk.