LADC hnuaia hna lak dan chhui chiangtuten report thehlût

Kum 2020 chhunga Lai Autonomous District Council hnuaia hna hrang hrang lak danah thil fel tawklo a awm nia sawi chhui chiang tura din, Study Committee on Appointment of Staff under LADC-2020 chuan nimin khan CEM Manghmunga Chinzah hnenah an thil zirchianna report kimchang an thehlut.

Adviser to CEM H.Lalmuansanga kaihhruai he Study Committee-ah hian LZ Tluanga, Deputy Secretary (GAD) chu Member Secretary niin, member dang Senior Officers 4 an awm a. Kum 2020 chhunga LADC hnuaia hna hrang hrang lak danah Dan bawhchhiatna a awm leh awm loh chhuiin sawrkarah report an pe a ni.

Manghmunga Chinzah chuan he Study Committee hi politics kaihhnawiha din a nilo tih sawiin, Dân bawh-chhiaa thiltih a awm leh awm loh enfiaha siamṭhat ngai alo awm a nih chuan dan chhungah siamṭhat tum a ni a ti a, Politics thil avanga hei hi kalpui ni lovin, LADC sawrkar zahawmna tur leh ram mipui, a bik takin zirlaite hmakhua ngaih avanga hna lak dante felfai zawka kalpui a ṭul tawh avanga enfiah hna hi thawh a ni zawk a ti a, dan anga hnaa lutte tan engmah hlauhthawn tur a awm loh thu leh, he report hi Executive Committee-in ngun takin a thlir zui dawn tih a tarlang a ni.

He Study Report phek 22-a chhah hi Study Committee aiawhin H.Lalmuan-sanga’n CEM hi a hlan a ni.

Leave a Reply

This site uses Akismet to reduce spam. Learn how your comment data is processed.