Covid-19 vaccine manah Mizoramin cheng vaibelchhe 47 vel sen a ngaih ring

Mizoramah kum 18-44 inkar vaccine pek ngai mi 5,86,702 vel niin chhut a ni a, heng mite tan hian vaccine manah cheng Vaibelchhe 47 vel sen a ngaih rin a ni.

Nimin khan DHME Conference Hall, MINECO-a Mizorama Covid-19 inkhuahkhirhna kalpui mek thlirhonaah he thu hi sawilan a ni a, Health Minister Dr. R.Lalthang- liana kaihhruaia he ṭhut-khawmnaah hian Vaccine chungchang report ngaih-thlak niin Inrinni kalta (24.4.2021) thlengin vaccine dose 2,99,870 Mizoram-in a dawng tawh a, vaccine dose 2,07,730 pekchhuah tawh niin, mi 41,313 in vaccine second dose an la tawh a ni. Sawrkar laipui record danin Mizorama kum 45 chin chunglam zinga 43.72% hnenah COVID-19 vaccine hi pek tawh a ni bawk. Tun kar chhung hian dose 1,00,000 dawn leh beisei a ni a, hengte hi kum 45 chung lamte hnena pek tur a ni.

May ni 1, 2021 aṭangin sawrkar laipui chuan kum 18 – 44 inkar tan vaccine pekchhuah tur a ti a, hemi chungchangah hian sawrkar laipuiin ruahmanna a siam danah Covid-19 vaccine siamtu (manufacturer) ten an siamchhuah zinga 50% chu sawrkar laipuiah an pe ang a, hei hi State hrang hranga Healthcare workers, Frontline workers leh kum bituk bik ṭhenkhatte tan a thlawna sem tur a ni ang a. Kum 18-44 inkarte vaccine dawn tur hi sawrkar laipuiin State sawrkarah a pe tawh dawn lova, State sawrkarin vaccine siamtute hnen aṭangin an mamawh ang zat an lei a ngai tawh dawn a, Mizoramin vaccine kan dawn ṭhin Covishield man thar tur hi hi official-a hriattir an la ni lova, private hospital-ten Covishield an pek chhuahna man Rs.250/- a lo ruahman tawh pawh sawrkar laipui hian a hnukkir leh a ni. Health department hotute chuan Covishield siamchhuaktu Serum Institute of India lamin sawrkar laipuiin Covishield an order sa pawh an la supply sen rih loh thu an sawi tih tarlangin, state sawrkarte hnena pekchhuah tur hi chu nghah rih a la ngai dawn tih an sawi thu an tarlang.

Nimina ṭhutkhawmna-ah hian India rama Covid-19 second wave lo hluar leh mek laka Zoram mipuite kan him theihna tur atana inkhuahkhirhna kalpui mek thlir ho a ni a, IDSP hotute hnen atangin tunhnaia Mizorama Covid-19 positive case pun dan report ngaih-thlak niin March ni 29, 2021 atanga April ni 25, 2021 inkarah positive 948 hmuh chhuah an ni a, Police Contact Tracing team hotute report daninn April thla chhunga positive 934 hmuh chhuah zingah hri an kaina chhui chhuah harsa 190 an awm a, April thla chhunga positive hmuhchhuah tawh zinga 509 (54.5%) hi tualchhunga inkaichhawng an ni a, 425 (45.5%) hi state pawn atanga lo lut (travel history nei) an ni.

Meetingah hian Covid-19 positive-te enkawlna tur Covid Care Centre (CCC) ruahman belh chungchang leh Dedicated COVID Hospital chungchangte sawiho a ni a, CCC leh Quarantine Centre hi tun dinhmunah chuan ruahman belh a la ṭul rih lo nia hriat niin, a ṭul dan azira hman turin hmun dang pawh thlithlai lawk a ni a, Paid CCC leh paid Quarantine Centre ruahman belh a ṭul thu sawi a ni bawk.

Covid-19 positive-te hman tur oxygen chu tun dinhmunah vanneihthlak takin damlo serious an la tlem avangin a thlaphanawm rih loh thu sawi a ni a, amaherawhchu hmalam hun hriat lawk a nih loh avangin lo inhmakhawsuih dan tur a theih ang anga ngaihtuah a ni a, F.Kapsanga, Tuikual te chhungin May thla chhung ZMC-SRHF oxygen mamawhte a thlawna an refill sak tur thu meetingah hian tarlan a ni.

CCC-a positive enkawl mek ten harsatna hrang hrang an tawh theih avangin anmahni lo thlamuana a tul anga lo buaipuitu tur psychologist/councillors in-volunteer tura ruahmanna siam mek a nih thu tarlan a ni a, boruak thlirin executive duty tur lak belh a ṭul dawna a lan thu sawi a ni a, dawr hawn chungchangah ruahmanna awmsa belh hleka ruahmanna thar siam a ṭul tih sawi a ni a, Zoram pumah rualkhai zawka inkhuahkhirhna kalpui a ṭhat thu tarlan a ni.

Covid-19 kaihhnawih thilah social media hrang hrangah thu belhchian dawl lo, mipui rilru ti chi-ai thei thehdarh a tam chu pawi an tih thu meeting-ah hian sawi a ni a, thuthang belhchian dawl lo thehdarh lo turin mipuite an ngen nawn leh a, sawrkar thuchhuak ngaichang hram hram ṭhin turin an ngen bawk a ni.

Heng bakah hian COVID-19 dona kawnga mamawh chi hrang hrang la awm theite sawiho niin, ruahmanna chi hrang hrang an sawiho a ni.

Nimina ṭhutkhawmnaah hian MOT Chairman Dr. ZR Thiamsanga, MLA, Chief Secretary Lalnunmawia Chuaungo bakah Covid-19 dona kawnga hma latu department hrang hrang hotute, Indian Medical Association (IMA), Non-Government Hospital Association of Mizoram (NGHAM), Jt. NGO Coordination Committee leh Mizoram Kohhran Hruaitute Committee (MKHC) aiawhte an tel a ni.

Leave a Reply

This site uses Akismet to reduce spam. Learn how your comment data is processed.