Mizorama khawpui hrang hrangah mipui an pun chhoh mek laiin mipuite tana PHE Department-in tui a lâkna lui hrang hrangah a kum telin tui a tlêm chho zel.
PHE Department-in Serchhip mipui châwmna atana tui a lâkna Tuikum luiah chuan Serchhip mipui châwmna khawp tur tui a la awm tih Serchhip WATSAN Sub-Division Sr. SDO Er. Samuel LR Ralte chuan Zothlifim zawhna chhângin a sawi a, chutihlai chuan kum hmasa lam aiin tui hna a tlem zawk tih a sawi.
Tun dinhmunah Ser-chhip khawpui châwmna atan hian ni khatah tui litre maktaduai 2.70 mamawh a nih laiin, nimina Tuikum luia tui tam lam an tehnaah, ni khatah tui litre maktaduai 14.72 a la awm thei tih a sawi a, nikum (2020) April ni 14-a Tuikum lui tui tam lam an tehnaah chuan ni khatah tui litre maktaduai 17.2 a awm a, nikum tun ang hun aia kumina tui tlemna hi litre maktaduai 2.48 vel lai a tling tihna a ni.
Tuikum lui tui hi nikum aiin kuminah tlem tawh mahse Serchhip mipuite châwmna tur khawp a la awm a, chutihlai chuan khawpui ṭhenkhatah chuan mipui châwmna atana duhkhawp tui lak tur a awm tawh lo thung a, Lunglei khawpui tui lakna Tlawng lui hnar chu a kangchah tawh avangin tui lakna hmun Pialthlengah duhkhawp tui pump tur PHE department chuan an hmu tawh lo a. Tun hnaia pump house bula an khuahna ṭhin thlang lam li aṭangin tui pump let ṭhin pawh tunah hian a kangchat tawh avangin tui lak tur a awm tawh lo a. Zobawk bula Tlawng hnarah hian ruahtui tlak laia a khawlna tur khuah ni mahse, kumin ṭhal a rei tak avang leh Lungleiah ruahtui mumala a la tlak loh avangin a kang char hneh hle tih thudawnna chuan a sawi a, Lunglei khawpuiah hian nitin tui litre nuai 70 vel mamawh anga chhut a ni a, hei hi tui pump tur a awm tawh loh vangin an phak tawh lo hle a, mimal hnen aṭanga tui lei tur pawh a vâng chho ṭan tih a sawi bawk.
Aizawl chawmtu tur tui an lâkna pakhat, Serlui chhuah chhakah Thawhṭanni apiangin tui pump chim chin teh ṭhin a ni a, hetianga an teh ṭhin aṭanga chhinchhiah a nih danin kum 2019 khan tui tlem lai berin litre nuai 707 a awm a, kum 2020-ah tui tlem lai ber April ni 1-ah litre nuai 600 awmin, April ni 19, 2021-a an tehna hnuhnung berah tui litre nuai 314 a awm a, kum 2019 aiin kumin (2021) ah za zelah 55 in tui awm zat a tlahniam tawh a ni.
A kum tela lui tuiin kâm lam a pan zel nia an ngaih chhan chu tlang lam leh lui bulhnai ramngaw vat chereu nasat a nih vang te, ruahtui lo paikhawltu tur ngaw siamtu thing leh mau an tlêm tawh vangte a nih thu PHE department thawktute chuan an sawi a, ngaw siam mai bakah tui siam pun nan lui dunga tui khuah siam thluah chu thil ṭha tak a ni tih sawiin, water supply-a harsatna kan tawh hun a thlen meuh chuan kan lo tlai hman tawh der a ni ṭhin a, chuvangin harsatna kan tawh tak tak hmaa tui hna tihpun kawnga hmalak hi a ṭul hle a ni tih PHE Department hotute chuan an sawi a ni.