Chief Secretary Lalnunmawia Chuaungo, State Disaster Management Authority (SDMA) State Executive Committee Chairman ni bawk chuan nimin khan thupek tichhuakin Covid-19 random test nei turin Health & Family Welfare Department a hriattir.
Covid-19 hri vei zingah an kaina chin hriat loh leh chhui theih loh engemawzat an awm tak avangin mipui mimir zingah he hri hi a darh nasa hle tawh nia ngaih theih a nih thu he thupekah hian tarlan a ni a, eng ang chiaha darh zau nge tih hriatna tur leh hmalak zel dan tur ruahmanna siam kawnga thuneitute tanpui turin random Covid-19 testing neih a ṭul tih tarlangin, Disaster Management Act, 2005 in thuneihna a pek angin Mizoram Chief Secretary chuan Covid-19 random testing chu an test turte remtihna (consent) la chunga kalpui turin thupek a tichhuak a ni.