Governor-in Health Minister, MKHC, Joint NGO leh sipai bang aiawhte a kâwm

Nimin chawhma kha Governor PS Sreedharan Pillai chuan Health Minister Dr R.Lalthangliana, MKHC hruaitute, Joint NGO hruaitute leh Ex-Services League aiawh te Durbar Hall, Raj Bhavan-ah Covid-19 hrileng thawhnihna dona kawnga Mizoram sawrkar hmalakna hrang hrang leh inpuahchahna te a sawipui.

Governor Pillai chuan tuna Covid-19 second wave laka kan himna tura state sawrkar hmalakna tichak tura pawl ṭangkai leh pawimawh tak takten dawhkan kilhoa sawihona neih a ṭul tawh em avanga Meeting chu koh a ni a ti a. Kan ram pumpui dinhmun a that loh avangin Vice President leh Prime Minister te chuan Governor te chu state sawrkar hmalakna te a chak zawk theih nan Raj Bhavan-te hmang ṭangkaia a ṭul anga state mamawh awm thei te hrechianga central thlen ṭhin tur te, mipui zirtirna kawngah kohhran leh khawtlang hruaitute nasa zawka thawhpui tura thurawn an pek tel thu a sawi bawk a ni.

Governor chuan mi pakhat hri veiin a fimkhur loh chuan ni 30 chhungin mi 406 a kai chhawng thei a, hei hian mahni inringhlel leh hrivei te inkhunghran pawimawh zia a ti chiang em em a. Tunah hian mithiam tam takin Covid-19 hrileng chu boruak atanga inkaichhawn theih angin an sawi mek a. Hei vang hian mitin ten kan him zawkna turin Hmaikawr (Mask) vuah hrim hrim hi kan tihtur a ni a ti.

Governor hoa meeting pawimawh-ah hian Health Minister Dr R.Lal-thangliana chuan Covid-19 dona kawngah Mizoram sawrkar chuan chawl loin thla 16 chuang zet hma a la tawh a, nasa zawkin tan a la sauh sauh mek a ni a ti a a, a ṭul chuan sawrkarin khirh zawka inkhuah-khirhna leh pawnchhuah khapna te pawh a siam a la ngai dawn a ni a ti.

R.Lalramnghaka, Special Secretary, Health & Family Welfare report pek dan chuan tunah hian mimal sumdawng Oxygen siamchhuahna khawl nei mi 4 bakah Aizawl Cilvil Hospital, ZMC leh District Hospital thenkhatah te Oxygen siamchhuahna a awm mek a. Heng atanga ni khat chhunga Oxygen siam chhuah theih zat chu 4800 Cubic Metre niin Mizo-ram mamawh chu a la phuhruk thei a ngaih a ni a. Oxygen siamna khawl neih belh tura hmalak mek a ni. Ventilator pawh ngaihtuah belh mek a ni a. Hrivei nazual te enkawlna Remdesvir pawh 1000 vials chah mek a ni a. Kum 18 chin vaccine lak theih hun atana hman tur Vaccine pawh mamawh zat thlen a ni tawh a. Nimin chawhnu lam thlenga Vaccine pek chhuah tawh zawng zawng zat chu dose nuai hnih leh singli a chuang tawh a ni.

Governor hoa Covid-19 hrileng dona kawnga sawihona hi Pu V.Lalsangliana, Secretary to Governor chuan a kaihruai a. He hunah hian MKHC aiawhin Rev.Lianhming-thanga Sailo, Vice President leh Joint NGO Coordination Committee aiawhin Vanlalruata, President, CYMA leh Ex-Services League aiawh in Surg.Lt.Cdr. Lalnuntluanga, Director, Sainik Welfare & Resettlement ten thu an sawi bawk a ni.