Nimin khan Taxation Auditorium, MINECO-ah Health Minister Dr. R.Lal-thangliana kaihhruaiin Mizo-rama Covid-19 inkhuahkhirh-na kalpui mek thlirho a ni a, May ni 3, 2021 zing dar 4 thlenga kalpui tur Mizoram puma inkhuahkhirhna dan kalpui mek dinhmun uluk takin an sawiho a, Covid-19 laka Zoram mipuite an him lehzual theih nan inkhuah-khirh hi kalpui chhunzawm ṭha an tih bakah, inkhuah-khirhna dan pawh tun aia khauh zawka siamṭhat ni se an ti a, State Executive Committee on State Disaster Management-in ruahman-na thar hi an siam dawn a ni.
Meeting-ah hian Vaccine chungchang report ngaihthlak niin tun thlengin vaccine dose 2,99,870 Mizoramin a dawng tawh a, nimin khan dose 1,00,000 a rawn thlen belh leh a ni. Vaccine dose 2,46,478 pekchhuah tawh niin, mi 45,435 in vaccine second dose an la tawh a ni.
Sawrkar laipuiin May ni 1, 2021 aṭanga kum 18-44 inkar vaccine pek tur a tih chungchanga hmalakna tarlan niin, H&FW department Special Secretary-in Covishield siam chhuaktu Serum Institute Pvt. Ltd., hnenah kum 18-44 inkar tan vaccine dose nuai 10.22 Mizoramin a mamawh thu a thlen tawh a, Serum Institute Pvt. Ltd., chuan kar 4 chhungin an rawn tihchian theih an inbeisei thu an sawi a, Mizoramin dose a mamawh zat chu thla 3-4 chhunga mamawh dan azira a tahtawl deuh hleka pek chhuah tura ruahmanna siam turin an rawn hriattir a, kum 18-44 inkar te hnena vaccine pek tur hi State sawrkarin an lei vek a ngai tawh dawn a, vaccine siam-tuten mamawh ang zat an siam chhuah theih loh avang-in State tam takin May ni 1 aṭangin an kalpui thei dawn lo a ni. Vaccine dose khat man hi Serum Institute hian an rawn tihniam leh tawh a, dose khat zelah Rs.300 (GST tel lovin) chawi a ngai dawn a ni.
Covid-19 hri kaite dahna tur CCC leh Quarantine ngaite khunghranna tur hmun indaihlohna a nasat chho ṭan vanga harsatna awm te sawiho a ni a, Community Covid Care Centre (CCCC) siam belh a ṭul thu sawilan a ni bawk.
Heng bakah hian Covid-19 vanga nunna chan hmun hla tak taka ruang dah ngaite phurhna tur Morgue Van/Ambulance a bika ruahman a ṭul thu sawi a ni a. A theih chin chinah Home Isolation/Home Quarantine kalpui ṭha tih niin, Health Minister chuan tun dinhmun-ah Oxygen leh Ventilator chungchangah thlaphanna tur a awm lo tih sawiin, FK Oxygen plant Zuangtui ten May thla chhung zawng ZMC-ah oxygen mamawh ang te a thlawna an refill dawn bakah Delhi Mizote hman tur oxygen ṭhahnem tak an thawn dawn tih a sawi bawk.