May ni 24 thleng Mizoramah Total Lockdown pawhsei a ni

Covid-19 hripui leng mekin ziaawm a pan rih loh avang leh a kai an pun chhoh zel avangin Mizoram pum inkharkhip hun chhung ni 7 dang pawhsei leh a ni a, sawrkarin inkharkhip a puan mek hi ni 17 (Thawhtanni) zing dar 4 thlenga hman tur a ni a, vawiin khan lockdown pawhseina thupek hi tihchhuah niin, ni 17.5.2021 zing dar 4:00 aṭangin 24.5.2021 zing dar 4:00 thleng pawhsei a ni.

Thla hlui April ni 20 aṭang khan mipui pawnchhuah khuahkhirhna hi kalpui a lo ni tawh a, hetihlai hian hri lengin ziaawm lam a pan theih loh avang leh khawtlanga inkaichhawn a pun chhoh zual avangin Mizoram sawrkar chuan ni 10 aṭang khan khauh zawka inkharkhip a puang a ni.

Inkharkhip pawhsei leh turah hian eichawp dawr leh chawhmeh zawrhnate chu Thawhlehni leh Zirtawpniah hawn theih an ni ang a, heng thil zawrhna hmuna bungraw sem tur te chu LLTF/VLTF te hriatpuina-in Thawhṭanni leh Ningani zan dar 8:00 aṭanga zanlai dar 12:00 inkarah an mamawhte an sem thei ang. Bazar hawn ni hian chawhmeh lei tura motora chhuah veivah khap a ni a, veng danga chawhmeh ilo lei tura kal a ngaih loh nan LLTF/VLTF tinten anmahni veng chhungah chawhmeh zawrhna tur ruahmanna an siam ang a, LLTF/ VLTF-ten chawhmeh zuarte thutna tur hmun fel takin an ruahman ang a. Bazar kal te thawl tak leh midang nena inhnaih lova an bazar theih nan chawhmeh zuartu te thutna inkarah feet 6 tal hmun awl an zuah zel tur a ni. Chawhmeh bazar leh dawr te hi tlai dar 5:00-ah khar ngei ngei tur a ni. Tlai dar 5:00 pelh hnuah tumah bazar kal tura chhuahvah phal a ni lo.

Mizoram Sawrkar hnuaia office zawng zawngte pawh khar chhunzawm tur a la ni a, amaherawhchu, DM&R, H&FW, Home (Police, Fire & Emergency Services, Home Guard, Civil Defense & Prisons), Excise forces, Finance & Treasury, District Administration, Civil Aviation leh I&PR te chu COVID-19 dona leh hna ṭul bikah an kal thei ang.

AMC Area leh District Headquarters-ah te chuan mahni in/compound chhunga hnathawktu leh hmanraw awmsate hmangin hna thawh phal a ni a, mahse, hmun dang aṭanga hnathawktu leh hmanrua/bungrua lakluh phal a ni lo a, hmasawnna hnathawh hrang hrang, lo leh huan lama hnathawh, quarry-a lung lak adt. chu AMC Area pawnah leh District Headquarters pawnah te chuan khuahkhirhna awm lovin kalpui theih a ni ang.

Loneitu leh huan neitute, ran vulhtute, sangha dil neitute leh a thawktute chu phalna hranpa lak ngai lovin an hna thawh phalsak an ni a, lo/huana hna thawk tura ram riah pawh phal a ni. Hmun khata mi 5 (panga) aia tam awmkhawm erawh chu khap a ni. Lo/huana kal/feh turte chuan zing dar 8:00 hmain khaw chhung (city/town area) an chhuahsan hman tur a ni a, tlai dar 5:00 hmaa an rawn luh leh phal a ni lo. Tin, police/ COVID-19 Executive Duty-te check theih turin VLTF/LLTF te phalna lehkha emaw an kalna tur lo/huan an nei ngei a ni tih lantirna document (LSC, periodic patta, adt.) an keng ngei tur a ni.

Sawkar thupek/ kaihhruainain a huam baka veng bil bik tana khuahkhirhna khauh zawk neih ṭul tihna a awm chuan, a chhan leh vang chiang taka ziakin LLTF/VLTF ten an awmna District DC hnenah rawtna an siam thei ang. LLTF/VLTF ten anmahni thuin inkhuahkhirhna hranpa/ Containment Area / Restricted Area an puang tur a ni lo.

Inkaihhruaina kimchang download duh tan HETAH hian download theih a ni e.

Leave a Reply

This site uses Akismet to reduce spam. Learn how your comment data is processed.