Ni 100 inhlawh dan tur ruahman

Rural Development Minister Lalruatkima chuan hripui leng karah ni 100 inhlawh dan tur ruahmanna siam a ni a ti.

Minister chuan Mizoram pumah chawhruala lakin April thlaah ni 11, May thlaah ni 12 leh June thlaah ni 10 inhlawh turin ruahmanna siam a ni, a ti a. Kumin atang hian Job Card Holder pakhatin nikhatah Rs.233/- zel an hlawh tawh dawn a, kum kalta 2020-21 chhunga inhlawhna Rs.225/- aiin Rs.8 in a tam zawk nghe nghe a ni, a ti. Tun dinhmunah Mizoram pumpuiah Active Job Card Holder mi 2,05,481 an awm mek thu a sawi a ni.

Lalruatkima chuan MGNREGS hnuaiah hian tuihna tipung tam thei tura kum 2019 atanga “Jal Shakti Abhiyan – Catch the Rain Campaign” kalpui a nih aṭang khan khaw ṭhenkhatah tuikhur hnara contour trench an siam chuan tuihna a titam zualin, kum dang zawng aiin ṭhalah pawh kang lovin tui a luang reng tawh a, a bik takin Tuipang RD Block hnuaiah department leh a chhawrtu mipuite an hlawhtling hle a ni, a ti a. Jal Shakti Abhiyan hi Mizoram khaw tinah kalpui tum a ni tih sawiin, tipung thei tur leh ruahtui tla dawng khawl thei tur siam tum a nih thu a sawi.