Vawk pul hri, African Swine Fever (ASF) vangin Serchhip District chhunga vawk thihna khua pun belh zelin, Serchhip District chhungah ASF vang hian vawk 36 a thi tawh a ni.
Dr. R.Lalmakthanga, DVO, Serchhipin Zothlifim zawhna a chhân danin, Serchhip District-a ASF vanga vawk thi awmna hmasa ber, Keiṭumah chuan hri len chhoh ṭantirha vawk 9 thi bâk a la thih belh leh lo a, hetihlai hian tunhnai khan E.Lungdarah vawk 17, Thenzawlah vawk 6, Chhiahtlangah vawk 2, Vanchengte leh New Serchhipah vawk 1 ve ve thiin, heng vawk thite sample an lak Laboratory-a endiknaah ASF hri kai an ni tih finfiah a nih thu a sawi a, April ni 1, 2021 aṭanga nimin (11.5.2021) thleng khan Serchhip District chhungah ASF vanga vawk thi zat hi 36 a ni tawh a ni.
Dr. R.Lalmakthanga chuan ASF vanga vawk thi awmna khua/vengah hian Lungsen lama ASF hri leng vanga vawk an thih puk puk anga thi puk puk an la awm loh avangin mipui tan chiaina tur a awm rih lova an hriat thu a sawi a, E.Lungdara vawk thite pawh hi farm pakhata awm an nih thu a sawi a, chutihlai chuan ran vulhtute chu an ran enkawl danah an ranten hri an kai lohna tura an fimkhur a ngai hle tih a sawi a ni.
Hetihlai hian Serchhip District-ah April ni 1, 2021 aṭanga nimin thleng khan an thih chhan hriat loha vawk thi 14 a awm tawh a, Kanghmun South-ah vawk 1, Serchhipah 6, N.Vanlaiphaiah 2, Chekawnah 1, Buangpuiah 3 leh Lungkawlhah 1 a awm tawh a ni.