Covid-19 hluar thar leh mekah Kolasib District Magistrate Dr H.Lalthlang-liana chuan sawrkarin ‘Standard Operating Procedure’ a siam zawmlote hrem an ni dawn tih a sawi.
DC office staff pakhat, Covid-19 a vei tih hriat-chhuah a nih chungchangah district bawrhsap chuan mipuite hnenah ngaihdam a dil a, positive an hmuh tak chu SOP protocol zawm lova mahni thu-a in-quarantine a ni a, DC office aṭanga dan bawhchhiat a ni chu zahthlak a tih thu sawiin, hetiang thil a thlen tawh loh nan hma an la tih a sawi a, positive-te chu khawngaih-thlak viau mahse dân a bawhchhiat avangin hremna an pe dawn tih a sawi.
Hei bakah hian DC chuan home quarantine laite tlawh phal a nih loh thu a sawi a, tunah hian Kolasib district-ah home quarantine tlawhtu mi 7 hriat an nih tawh thu leh anni pawh notice pek an ni a, hrem an ni dawn tih a sawi a, dan zawm lote chu hrem zel an tum tih a sawi bawk.
DM chuan SOP thar a awm hnuah home quarantine chu Kolasib district-ah kalpui ve chhin a ni a, hei hi a zawngchhangtlak loh tih sawiin, quarantine centre-ah dah zel tawh nise an duh tih a sawi bawk.