Dr. K.Lallawmzuala, District Medical Superintendent, Serchhip District chuan Covid-19 laka mipui kan him theih nan Hospital-a kalpui tur thupek a tichhuak.
Thupek a tihchhuahah chuan OPD-a inentir tur zawng zawngten face Mask vuah vek tur a ni a, social distancing ngaih pawimawh hle tur a ni a ti a, OPD-a hming ziah hmain gate-ah screening neih tur a ni a, Covid-19 symptoms nei a ngaih te chu RAgT-tir nghal an ni ang a, hming ziak tura intlar laiin rin bial (Marking) ah zel din tur a ni a ti a, pun khawmna hmunah kan khuh dawn chuan banin ka leh hnar khuh/hup tur a ni a ni tih tarlangin, kum upa (kum 70 chung lam) chak lo leh na zual deuhte en hmasak ṭhin tur an ni tih a tarlang.
Damlo admit tur zawng zawngte chu Covid-19 Test (RAgT/TRUENAT) vek tur a ni a, OPD leh Casualty aṭanga damlo admit tur te chu, a admit-tu doctorin test dan tur a ngaihtuahsak ang a, damlo na zual bik leh nau nei mai turte chu, Ward-ah sample lak tur a ni ang a, anmahni enkawlna tihkhawtlai tur a ni lo a ti a, Emergency nilo zai turte chuan ni 2 aia reilo Covid Negative result an nei tur a ni tiin, Minor Operation (Inzai tenau), Endoscope, Dental Procedure (Ha phawi, Ha hnawh) etc damlo admit ngailoah pawh ni 2 aia reilo COVID Negative Result neih tho tur a ni a ti bawk.
Hei bakah hian damlo awmpuitu turten ni 2 aia reilo Covid-19 Negative Result neih vek tur a ni tih tarlangin, damlo awmpuitu pakhat bak awm phal a ni loh bakah inthlak phal a ni lo tih a tarlang a, loh theih lohah chuan Ward Incharge (Doctor/Nurse) bulah dil tur a ni a, a thlaktu tur pawh RAgT Test ve tho tur a ni a ti bawk a, damlo chaw pe tur ten gate-ah inhlan chhawn tur a ni a, damlo awmpuituten damlo dang kan/tlawh kual phal a ni lo a, damlo boral an awm palhin damdawiin chhungah mi panga (5) aia tam luh phal a ni lo tih a tarlang bawk.