Zothlifim Logo
Loading ...

Ni 21 July. 2021 (Nilaini) khan Serchhip ZPM Party Block Thalai hruaitute chuan Home Minister Bial chhunga kawngpui laih zauh leh siam ṭhat hna thawh mekte chu a hmuna kalin hna thawh dante an enfiah.

Hemi hnua Serchhip ZPM Party Block Thalaiin thuchhuah an siamah, hna ṭhat loh thu sawisep leh report awm bawhzuiin, Home Minister Lalchamliana Bial, Hrangturzo Bial chhunga inkal pawhna kawngpui laih zauh leh black-topping hna lian tak, Mualcheng Arṭah-kawn — N.Vanlaiphai leh, Chekawn — N.Vanlaiphai kawng laih zauh mekte chu Serchhip ZPM Block ṭhalaite chuan an hna thawh tawh chin te, plan & estimation-te nen a inmil em tihte thlithlaiin, a hmuna thawktute pawh thil nihphungte an zawt fiah tih an sawi a.

ZPM Thalaite chuan, Mualcheng Arṭahkawn — N.Vanlaiphai inkar kawng laih zauh leh black-topping hna thawh mek chu a hna a chhiain a lungawi thlak loh an ti hle tih an sawi a, sawrkar pawhin he hna thawh mek hi enfiah se, a ṭul anga hma la turin sawrkar an phût thu an sawi bawk.

He kawng laih mek hi Ministry of Rural Development hnuaia PMGSY hna niin, Bhavya Construction Co. thawh a ni a, a kawng laih zauh (widening) chu zawh ṭep ni tawh mahse, black-topping a chhiat hle thu te, fur khat pawh a tawrh hmain hmun tam taka a chhiat leh tawh thu te, hmun ṭhenkhatah phei chuan kut lâwng pawha kheuh khawh mai theih a nih thu te an sawi a, a lungawithlak loh an ti hle tih an sawi.

Chutihlaiin, hna thawk-tute chuan ruahtui tlak loh hnua black topping chhe laite chu an siamṭhat leh dawn thu an lo hrilh niin an sawi a, chu pawh chu thu neitute’n/sawrkarin en zui ngei se an duh thu an sawi bawk.

ZPM Thalaite chuan, Hrangturzo Biala hna thawh mek tho, Chekawn — N.Vanlaiphai inkar kawng laih zauh hna (21 km-a thui, cheng nuai 1,386/- man), LZ Constructions (Aizawl)-ina an thawh mek dinhmun chu an en nghal bawk a; hna kal a muan thu sawisep awmte chu a chhan an zawtfiah a, an lo chhannate chhuanlam tling takin lang mah se, ZPM ṭhalaite chuan muangchang loa a hma thei anga inpeihfel tura an duh thu an sawi bawk.