Mizoram Pradesh Congress Committee (MPCC) chuan thuchhuah siamin, July 13, 2021 khan Prime Minister Narendra Modi hovin Union Minister ṭhenkhat, Official pawimawhte leh North East state Chief Minister 8-ten video conferencing hmangin meeting pawimawh tak an neihnaah state ṭhenkhatin an state chhunga Covid-19 an do hlawhtlin dan report ngaihnawm tak tak an pek laia Mizoram Chief Minister Zoramthanga chuan Mizorama Covid-19 hluar chhan chu raltlan an tam vang nia a sawi chu pawi an tih thu sawiin, Covid-19 do kawnga MNF sawrkar hlawhchhamzia thupna atana raltlante mawhphurhtir tumna chu ṭha an tih loh thu an tarlang a, Chief Minister Zoramthanga chu Prime Minister, Union Minister-te leh NE Chief Minister dangte hmaa a thusawi a dik lohzia hriaa ngaihdam dil ngei turin an phût a ni.
Congress chuan an thuchhuahah chuan India rama Total Lockdown puang rei ber kan ni chunga Mizorama Covid-19 hluar zelna chhan chu raltlante vang ni lovin, Covid-19 dona kawnga MNF sawrkar a hlawhchham vang a ni, an ti a, mipui lamin sawrkar thu an zawm ṭhat em em laiin sawrkar berin a tih tur a ti ṭha lo hle a, sample test a kalpui danin duhthu a sam lo hle a, laboratory a din chak lo a, Covid veite enkawlna tur Hospital ruahman lamah pawh a chak loh bakah Vaccine pek pawh a chak tawk lo hle tih an tarlang a, Covid-19 dona kawnga MNF sawrkar hlawhchhamna chu pawm a, hmasawnna kan neih theih nana theihtawp chhuah zawk turin Congress Party chuan Chief Minister chu an ngen bawk a ni.