Zothlifim Logo
Loading ...

Joint Action Committee on Inner Line Reserve Forest Demand chuan nimin khan India ram President hnenah memorandum thehlutin Assam leh Mizo-ram ramri chungchanga hmala turin an ngen.

Mizoram chu Assam hnuaia an awm aṭang tawh leh a awm loh hnuah a ramchhung chin enkawltu a nei hran lova, Assam sawrkarin tun thlengin a enkawl a, ram neitute pekkir pawh tum lovin ramri ah hian harsatna hrang hrang a siam zui zawk a ni an ti.

Hetianga ṭhenawmte nêk zawnga an chêt chhan hi an vote zawnna hmanrua niin, Bangladesh aṭanga dân lova lo lûtte dah ngheh nan an ti a ni tih an lehkhaah chuan tarlangin, an hmalak-na kawngah hian Mizo te nek chep zawng leh an chak lakna kawngpui ber dang zawngten an che a, anmahni lam Police te pawh Mizoram chinah an ṭhuttir hial a ni an ti.

Assam state pawi-khawihna avang hian The Scheduled Castes and The Scheduled Tribes (Prevention of Atrocities) Act, 1989 hnuaiah Assam Chief Minister, Forest Minister, Cachar District leh Hailakandi District DC bakah an official-te hrem ngei ni se an ti a, July thla chhung ngeia hmalakna an hmuh loh chuan engpawh thleng se mawhphurhna an la lovang tih an sawi bawk.

Assam CM hnenah pawh lehkha thawnin, Mizo-ram china an police force-te hnûkkir turin an hrilh a, Mizorama thlai leh thildang an tihchhiat avanga compensation pe ngei tura hrilh bawkin tun thla chhunga hmalakna an hmuh loh chuan thil duhawmlo a thleng a nih pawha mawhphurhna an lak loh tur thu an sawi a ni.