Mizoram leh Assam inkara harsatna awmte sukiang turin Union Home Secretary kaihhruaiin Chief Secretary-te inbia

Assam Police-ten July ni 26, 2021 (Thawhtanni)-a Mizoram rawn lûta buaina an siam vanga state pahnih inkara harsatna awmte sukiang turin Union Home Secretary Ajay Kumar Bhalla kaihhruaina hnuaiah nimin chawhma khan Mizoram Chief Secretary Lalnunmawia Chuaungo leh Assam Chief Secretary Jishnu Barua-te chu North Block, New Delhi-ah an inbia.

Meeting-ah hian tuna Mizoram Police awm mekna a CAPF-te awm tir tura nawrna nasa tak a awm avangin inremna an neih theih loh avangin nimin tlai dar 4:30 khan an indawr chhunzawm leh a ni a, Ministry of Home Affairs leh Assam Chief Secretary-ten nasa taka Vairengte auto rickshaw stand aṭanga Mizoram police-te tawlh-sawn turin nawr mahse, Mizoram Chief Secretary Lalnunmawia Chuaungo chuan nasa taka hnial leh dodalin, Mizoram sawrkar leh Mizoram mipuite duhdan a nih loh thu leh an tawlh-sawn nachhan tur an hriat loh thu sawiin a ṭang tlat a.

Rei tak inbiak a nih hnuah Mizoram leh Assam inrina NH 306-ah Central Armed Police Forces (CAPF) duty chhunzawm tura remtih niin, CAPF senior officer-in a hmunah ṭhutchilh tura tih a ni a, hei bakah hian Mizoram leh Assam sawrkar chuan CAPF duty-ten ṭha taka hna an thawh theih nan sawrkar laipuia Ministry of Home Affairs râwn chunga ruahmanna felfai tak siam an remti a, ramri buaina chingfel turin zai ngai tawn tak chung leh harsatna dang siam lova inbiak chhun-zawm zel an remti bawk a ni.

Lalnunmawia Chuaungo, Chief Secretary chuan Assam-in Mizoram kawngpui an dan chah (Road Blockade) bakah rel kawng an tihchhiat avanga ei leh bar lâkluh kawnga harsatna Mizoramin a tawh thu Union Home Secretary hnenah hian thlen nghalin a rang lama chingfel turin a ngen nghal bawk a ni.

Mizoram Chief Secretary hi Mizoram DGP SBK Singh chuan ṭawiawmin Assam Chief Secretary hi an DGP-in a ṭawiawm ve bawk a ni.

Leave a Reply

This site uses Akismet to reduce spam. Learn how your comment data is processed.