Mizoram sawrkara Home Secretary Lalbiak-sangi chuan Mizoram tana nitin mamawh, ei leh bar chawk luhna kawngpui Assam-in an dan pin bakah rel kawng an tihchhiat chungchang Union Home Secretary, MHA hnenah thlenin, Assam sawrkar pawikhawih mek titawp turin khauh taka thu pe turin a ngen.
Nimina sawrkar laipui Union Home Secretary hnena Home Secretary Lalbiaksangi’n lehkha hmanga thu a thlen danin, July 26, 2021 aṭanga Mizoram mipuite’n nitin mamawh an lakluhna kawngpui pawimawh ber national highway 306 dan pin mai duhtawk lovin Assam aṭanga Mizoram luhka zawng zawngte chu Assam sawrkarin a dan chah vek avanga nitin khawsak nitin khawsak phungah Mizoram mipuite harsatna a siamsak niin a sawi.
Home Secretary Lalbiaksangi chuan, Assam state sawrkar hmalaknain Mizoram chak lakna kawng te hi nikum October ni 17 aṭanga November ni 11 thleng khan a lo dang chat tawh thu leh, kha thil thleng khan nasa takin Mizoram mipuite nitin khawsak a tihbuai thu leh vawiin thlengin mamawh phuhrukna kawngah harsatna Mizoram an la tawk chhunzawm zel tiin, “National Highway leh rel kawngin an state a paltlang avanga duh hun huna Mizoram panna kawngte Assam-in a chhu chat zel mai hi pawikhawihna lian tak a ni. Hetiang thil hi vawi tam tak a thleng tawh ṭhin a ni” tiin a lehkha thawn a tarlang.
Assam state chhunga Hailakandi district-ah misual tu tih hriat loh te’n Mohammedpur Railway Station leh Ramnathpur Railway Station a rel kawng an tihchhiat thu sawiin, “He rel kawng tihchhiat tak hi Mizoram tana kawng pawimawh tak niin Bairabi Railway Station pawhna kawng awmchhun a ni a. National Highway tih lohah chuan Mizoramin mamawh a phurh luh theihna kawng awm chhun a ni,” a ti.
“National Highway leh rel kawng neitu dik tak chu sawrkar laipui a nih avangin state sawrkar emaw, mipui emaw, eng pawl mahin dang turin thuneihna an nei lo va, heng kawngpuite kaltlanga mamawh phurh luh tih tawp theihna dan an nei lo,” tiin, sawrkar laipui chuan he thil pawi tak thleng mek hi a ngaihthat thian loh thu leh an pawikhawih mek titawp turin Assam sawrkar hnenah khauh taka thu pe turin Lalbiaksangi chuan Union home secretary a hrilh a. Mipui mamawh phurh luhna tura National Highway leh rel kawng te paltlang a nih leh thuai theihna tura hma la turin a ngen bawk a ni.