NSUI-in a rûka lak zirtirtu 154 bân vek turin sawrkar an phût

NSUI Mizoram chuan thuchhuah siamin, kumin, 2021 kumtir lamah khan Government High School 95, RMSA High School 4 leh Lumpsum Grant-in-Aid High School 1, a vaiin High School 100-a thawk turin zirtirtu 154 a rûkin lak an ni tih an sawi a, heng mite hi bân leh vek tura sawrkar an phut thu an sawi.

NSUI Mizoram chuan heng zirtirtute lâkna tur hian Advertisement chhuah a ni lova, tu lak nge an nih tih pawh hriat a ni lo va, Appointment/Engagement Letter pawh pek an ni lo a, tute’n emaw an thawhna tur High School-ah Joining Report pe turin an hrilh a, an hrilh ang chuan Joining Report an pe tawp a, High School lam pawhin an zirtirtu thar neih chu lawm takin an lo thawhtir ve mai a, Joining Report hi an bialtu DEO-te hnenah an thawn ve leh a, chumi zarah chuan DEO-te pawhin an District chhungah zirtirtu thar an awm tih an lo hre ve ta chauh a ni, an ti.

Heng zirtirtu lak zingah hian ṭhenkhat chu High School zirtirtu atana qualified lote an ni tih an sawi a, hetianga mumal lo taka zirtirtu lak a ni hi diklo an tih thu leh pawi an tih thu NSUI chuan an sawi a, sawrkar sum hmanga hlawh pek tur an nih chuan engtin nge Finance Department pawhin an hlawh tur a pek ang tih chu ngaihtuah tham leh enzui ngai takah a ngai tih an sawi bawk.

NSUI chuan ṭhalai lehkhathiam hna hmulo tam tak an awm laia ramhlui zia, mahni duhsak zawngte hna a thunluh nana zirna in hmanglo turin NSUI (Mz) chuan sawrkar a phut tih sawiin, heng zirtirtu lak thar, mi 154 te hi an hna aṭanga chawlhtir vek tur leh zirtirtute hi dân ang taka Advertisement chhuaha Qualified Zirtirtu ngei la ṭha leh turin Mizoram sawrkara thuneitute an phut tlat tih an sawi a, bântir an nih a, lak ṭhat an nih loh chuan a ṭul ang zelin NSUI(Mz) chuan hma a la zel dawn a ni, an ti.

Leave a Reply

This site uses Akismet to reduce spam. Learn how your comment data is processed.