Mizoramah vawk pul hri (African Swine Fever) vangin vawk 20310 a thi tawh a, nimin khan vawk 272 a thih belh leh a ni.
AH & Vety department hotute sawi danin March thla laihawl aṭanga lêng ṭan vawk pulhri hi hmun tam takah a reh chho ṭan tawh a, a lên hmasakna khaw tam takah chuan vawk thi a awm tawh lo a ni. Chutih laiin hmun hrang hrangah vawk thi a awm belh ve zel a, thla hmasa aṭang khan Mizoram district zawng zawng a tuam chhuak tawh a ni.
District hrang hrangah Aizawl District chu vawk thih tamna ber niin vawk 8576 a thi tawh a, Lunglei District-in dawtin vawk 3677 a thi a, Serchhip District-ah vawk 2917 thiin Mamit District-ah vawk 2347 a thi a, Hnahthialah vawk 1012 thiin Khawzawlah vawk 711 a thi bawk a ni. Saitualah chuan vawk 404 thiin Lawngtlai ah vawk 320 a thi tawh a, Champhai District-ah vawk thi 293 awmin Kolasib-ah vawk 51 a thi a, Siaha District-ah vawk thi tlêm berin pahnih thi a awm tawh a ni.
Hetihlai hian ASF vawk pulhri nia rinhlelh, mahse la finfiah loh vawk 29 nimin khan a thih belh a, vawk pulhri finfiah loh ASF nia rinhlelh vanga vawk thi zat hi a vaiin 712 a ni.
ASF hi khua leh veng 222 ah a leng mek a,nimin khan vawk 248 suat a ni a, ASF avanga vawk suat tawh zawng zawng zat hi vawk 7920 a ni.