Lai Autonomous District Council (LADC) Chief Executive Member (CEM) atan Paithar bialtu MDC, V.Zirsanga thlan a ni a, V Zirsanga chuan MNF Party sawrkarna rintlak tak an din dawn tih a sawi.
Tarlan tawh angin, LADC Fur ṭhutkhawm Ningani aṭanga ṭanah, Session ṭan niin LADC-a MNF sawrkar, Manghmunga Chinzah kaihhruai chu MNF member 4-ten rintawklohna motion an putluh hmangin paihthlak a ni a, nimin khan Chief Executive Member thlanna chawhnu dar 2-a neih turah Ningani tlaia Chairman a nihna aṭanga bang, Paithar bialtu MDC V.Zirsanga leh Lawngtlai Chandmary bial aṭanga Independent-a thlan tlin Dr. Lorrain Lalpekliana Chinzah-te’n hming an pe lut a.
Engemaw chen sawiho a nih hnuah member 11 – MNF member 8 bakah Independent member pahnih leh Congress member pakhat-ten CEM chuh tura hming pe lut Dr. Lorrain Lalpekliana Chinzah telin House an chhuahsan a, hemi hnu hian Pannel of Chairman VL Hmuaka chuan Paithar Bialtu MDC, V.Zirsanga chu Chief Executive Member atan chuhtu awm lova thlan tlin a nih thu a puang ta a ni.
LADC CEM thar atana thlan tlin tak V.Zirsanga hi kum 2005 aṭangin LADC inthlanpui ṭum 4 neih tawhah a zâwnin Paithar bial aṭangin thlan tlin a ni tawh a, châwl lovin kum 16 chhung MDC a nihna a hmang mek a, LADC sawrkarah hian Chief Executive Member bakah Chairman leh Executive Member-te a lo ni tawh ṭhin a ni.