Conservation Mizoram chuan thuchhuah siamin, “Kan neihchhun Zoram nuam hi kan thlah lo la awm zel turte tana chenna tlak a nih zel theih nan Oil Palm chinna tharthawh leh tur hi NGO hrang hrang leh mipuiten kan hnawl ngam kan beisei takzet a ni,” an ti.
Conservation Mizoram-in thuchhuah an siamah chuan kan ram hi biodiver-sity-ah a hausa em em a, khawvela Biodiversity Hotspot hausa tak huam chhunga awm a nih angin kan ram hlutna hi ṭhangthar lo awm zel tur tana chhenfakawm tur khawpa hnut-chhiah chu kan tih makmawh a ni, an ti a, kan ram biodiversity-a hausa tak hlutna tihniamthei thil reng rengte do tlat turin Zoram mipui te an ngen tak meuh tih an sawi.
Ni 8 August 2021-a Prime Minister Narendra Modi-a’n Twitter-a a tarlan angin Central sawrkarin Oil Palm chinna tharthawh leh tura hmalaknaah India hmarchhakte a tinzawn hle tih a lang tih tarlangin, chumi piah lamah ni 19.8.2021 khan Mizoram Chief Minister Zoramthanga chuan Twitter hmang veka hemi chungchanga lawmthu-sawina a siam chu pawi an tih thu an tarlang a, “Kan ram biodiversity tichhe thei sumchangthlai chinna tura hmalakna hi kalpui lo turin kan ngen tak meuh a ni,” an ti.
Oil Palm chinna atana ramngaw zau tak tak ṭhiah a ni ṭhin te, Oil Palm-in khuarel sik leh sa a tihdanglam nasat dante en chung leh mithiamte thuziak tam takin Oil Palm-in khuarel a tihkhawloh nasat ziate hre reng chungin Conservation Mizoram chuan Oil Palm chinna tharthawh leh tura hmalakna chu a duhlo a, chhunzawm lo turin sawrkar pawh an ngen tih an tarlang a, Zoram hmangaihtute chuan kan ram tichhe thei hmalakna hi a tawp thlenga hnualsuat ngam turin an ngen tih an tarlang.