Inkhuahkhirhna tun thla ni 18 thleng kalpui turin pawtsei

Covid-19 avanga Mizorama inkharkhip (partial lockdown) kalpui mek chu tun thla ni 18 thleng pawhsei leh a ni.

State Executive Committee, Mizoram State Disaster Management Authority chuan hripui darh mek dan thlirin Partial Lockdown hman mek chu kalpui chhunzawm ṭha a ti a, Chairman Lalnunmawia Chuango chuan hemi chungchanga thupek chu inrinni khan a tichhuak a a, September ni 4 thlenga SOP hman tura tih chu hman chhunzawm tur a nih rualin, Covid-19 vei mek awm lohna khuaa ‘Sikul hawn theih’ tih chu ‘Zirna-in hawn theih’ tia thlak a ni.

He thupek chhuah bawhzui hian Serchhip District Bawrhsap Lalmuan-sanga Ralte pawhin Inrinni vek khan Serchhip District chhunga ni 5.9.2021 (Pathianni) zanlai pelh aṭanga ni 18.9.2021 (Inrinni) zanlai dar 12:00 thlenga inkaihhruaina kalpui dan tur thupek a tichhuak bawk.

Serchhip District chhunga inkaihhruaina thar tihchhuahah chuan Covid-19 hri kai mek awm lohna khuaahte chuan VLTF-te leh Tualchhung Kohhran Committee-te inrawn tlangin, inkhawm an duh chuan an duhnate Deputy Commissioner, Serchhip-ah an thlen thei ang. Phalna hi Deputy Commissioner-in a hranpain a chhuah ang a, heng phalna pek khiaahte hian Kohhran Rorel Inkhawmpui (Bial inkhawmpui) chu inkaihhruaina zawm chungin chhun lamah neih phal a ni a, amaherawhchu inkhawmpui neihna hmun Biak In-a leng zat chanve (50% seating capacity) emaw mi 200 aia tam lo emaw tel phal a ni a, Covid-19 symptoms neite chu Inkhawmpuiah hian tel loh tur a ni a, CAB khauh taka kenkawh leh zawm tur niin, a thlengtu kohhran-in VLTF te phungbawma sawmin CAB/SOP Implementation Committee an din tur a ni a, inkhawmpuiah hian natna benvawn nei leh kum upa, hriselna chak tawh lote a theih chin chinah awl ni se tih niin, tlai lam ruai buatsaih loh tur a nih bakah inkhawmpui-ah hian zai phal a ni lo a ni.

Zirna in-te pawh Covid-19 hri kai mek awm lohna khuaahte chuan Deputy Commissioner (DC) leh Village Level Task Force (VLTF) te ruahmanna-in kal theih a ni dawn a, hemi atan hian VLTF-te leh School Management Committee/CDPO or CO te nen inrawn tlangin, school/anganwadi hawn an duh chuan an duhnate Deputy Commissioner, Serchhipah an thlen thei dawn a, amaherawhchu Health & Family Welfare Department leh School Education Department-ten inkaihhruaina dan (SoP) an siam zawng zawngte zawm vek tur a ni a, Zirna in hawn hnuah hri kai thar an lo awm a nih chuan chawp leh chilhin zirna in chu khar nghal tur a ni a, Zirna in (educational institution) hawn phalna hi a hranpain Serchhip District Bawrhsapin order a chhuah tur a ni dawn bawk a ni.

Mizoram sawrkar hnuaia Office-te chu kal vek tur a ni a, Head of Office-te chu CAB khauh taka kengkawh tura tih an ni a, inneih inkhawm leh mitthi vuinaah mi 30 aia tam kal phal loh a la ni zel a, Sports practice phal a ni a, District Hqrs. chhungah chuan Indoor-ah mi 10 aia tam lo leh outdoor-ah mi 25 aia tam lo tan phal niin, Covid-19 symptom neite erawh tel phal an ni lo a ni a, Gym-te pawh inkaihhruaina zawm chunga hawn phal an ni a, zing/tlai walking leh cycling exercise chu phal a ni a, Sports inelna, tournament, adt. (indoor & outdoor) leh Mipui punkhawmna, anniversary, birthday, adt.-te erawh phal loh a la ni chhunzawm zel a ni.

District Hqrs. chhungah chuan eichawp zawrhna dawr te, In sakna hmanraw hrang hrang zawrhna dawr te, Thlai leh thei zawrhna dawrte chu ni tin zing dar 5:00 aṭanga tlai dar 5:00 thleng hawn phal a ni a, dawr dangte chu kar khatah zing dar 5:00 aṭanga tlai dar 5:00 thleng ni 4 chhung inhawn phalsak niin, dawr hrang hrangte inhawn chhawk dan tur chu VLTF-te chu an vengah ṭheuh ruahman tura tih an ni a, Dawr hawn chungchangah veng bil inkhuahkhirhna hranpa neih a ngai a nih chuan VLTF-te’n District Bawrhsap hnenah rawtna an thlen thei ang tih a tarlang bawk.

Bungraw load leh unload chu District Hqrs. chhungah chuan tlai dar 5:30 aṭanga zing dar 4:00 thleng phal a ni a, Taxi leh Auto Rickshaw te chu nitin an service thei ang a, Aizawl leh District danga ṭûl bik thila phalna neite veivahna turin maxi cab neituten VLTF phalna lain an service thei ang a, Serchhip District chhunga khaw hrang hranga maxi cab-te chu Serchhip District chhungah service phal an ni bawk a ni.

Serchhip District Hq. pawn lam khuate-ah chuan inkhuahkhirhna hi SDO(C) leh BDO-te an huam chhung ṭheuhah khauh taka kengkawh tura tih an ni a, thupek zawm lo chu Disaster Management Act, 2005 Section 51 aṭanga 60, the Mizoram (Containment & Prevention of the spread of COVID-19) Act, 2020 leh IPC Section 188 hmangin hrem theih an ni tih thupekah chuan tarlan a ni bawk.

Leave a Reply

This site uses Akismet to reduce spam. Learn how your comment data is processed.