Nimin khan Serchhip Bazar building tuala dawr nei, Bazar tuala secondhand zuar ṭhin ni bawk pakhat chu Covid-19 hri a kai tih hmuhchhuah a ni a, Thawhlehni khan Serchhip Bazar Police Beat Post bula dawrtea thil zuar (hawker) pakhat chuan hri a kai tih hmuhchhuah a nih bawk avangin hri leng darh zel tur venna atan Bazar building leh a chhehvel chu nimin tlai dar 5 aṭang khan ‘hmun khuahkhirh bik’ (Restricted Area)-ah nimin khan Serchhip District Bawrhsap chuan a puang a, vawiinah Serchhip Bazar-a ṭhute sample test runpui hi neih a ni dawn a ni.
District Bawrhsap, Lalmuansanga Ralte-in Serchhip Bazar building leh a chhehvel ‘hmun khuah-khirh bik’-a a puana thupek-ah chuan Bazar building pumpui leh a kawtkai, building hnuailam sa zawrhna a huam ang a, Police Beat Office aṭanga Bazar building lam hawi dawr zawng zawng, B.Lalbiaktluanga dawr/sumo counter thleng a huam ang a, Kawnpui North lama vantlang zun-in leh a hnuai dawr pahnih, YMA Information Office hnuai dawr thleng a huam tih a tarlang a.
Helai huam chhunga cheng zawng zawngte chu mahni ina inkharkhip vek tura hriattir an ni a, dawr neite pawh hawn phal a ni lova, rikrum leh hman-hmawhthlak thil ṭulah chuan VLTF remtihna leh sawrkar dan siamsa zawm tur a ni a, he khuahkhirhna hian Executive Magistrate, Health Department, Police leh Fire & Emergency Services, Public Health Engineering Department, Power & Electricity Department, Excise & Narcotics Department-te a hnathawk, Restricted Area-a duty neite leh Deputy Commissioner, Serchhip emaw Sub-Divisional Officer (Sadar), Serchhip emawin a bika phalna a pekte chu a huam dawn lo tih a tarlang bawk.