CADC chairman atan Rasik Mohan Chakma thlang

Thla khat leh a chanve vel kalta aṭanga sawrkarin buaina a tawh avanga an neih lawk theih loh hnuah nimin khan Chakma Autonomous District Council (CADC) fur ṭhutkhawm neih a ni a, amaherawhchu session-ah hian sawrkar thil pawimawh engmah khawih a nil ova, CADC chairman chuan MNF Legislature Party leader atan Rasik Mohan Chakma thlan a nih thu a puang a ni.

Rashik Mohan Chakma hi CEM-ah puan mai tur a ni dawn a, Executive Committee din thuai rin a ni.

Tarlan tawh angin CADC-a Chief Executive Member (CEM) Durjya Dhan Chakma chuan Pathianni khan CADC Chairman kaltlangin Mizoram Governor hnenah CEM aṭanga bânna a thehlût a, DD Chakma chuan ama duh thu ngeia CEM aṭanga banna thehlut a nih thu sawiin, CADC sawrkar leh MNF Party chhunga buaina awm chin felna leh inremna a awm theihna a nih a beisei vanga bânna chu theh lut a nih thu a sawi a, CADC chuan hruaitu thar tha zawk kaihhruaina hnuaiah hmasawnna duhawm tak a hmuh zel a beisei, tih a sawi.

DD Chakma hi Kamalanagar North aṭanga MDC atan thlantlin niin, kumin April 6, khan CEM atan lakluh a ni a, tunhnaiah CEM lakah hian mipat hmeichhiatna lam hawiah Chawngte Police Station-ah FIR thehluh a lo ni tawh a, hei vang hian MDC 10 chuan CEM aṭanga bang turin an nawr a, hetihlai hian DD Chakma chuan a laka FIR thehluh chu intih-mualpho tumna leh inphiar-rukna a nih thu a lo sawi tawh a ni.

Leave a Reply

This site uses Akismet to reduce spam. Learn how your comment data is processed.