Nimin khan Mizorama PM CARES Fund sum hmanga 250 Litres per Minute PSA Oxygen Plant 14 bun tharte chu Prime Minister Narendra Modi chuan internet kaltlangin ramchhung hmundanga mite rualin a hawng a, heng zingah hian Serchhip District Hospitala bun thar Oxygen Plant pawh telin, hemi pual hian Serchhip Hospital tualah Health Minister Dr. R.Lalthangliana hovin hun hman a ni.
Prime Minister chuan zing dar 11-a a hawnna hun a neih hma deuhvin Serchhipah hian PSA Oxygen Plant thar hawnna pual inkhawm tawi lo buatsaih hmasak a ni a, he hunah hian Dr. R.Lalthangliana chuan PSA khawl thar dahna hmun chu hawngin a fangkual a, chumi hnuah inkhawm tawi buatsaih zui a ni.
Minister chuan hriselna lama hmanrua leh thawktu kan mamawhna a pung nasa hle a, hmanrua leh khawl pawimawhte hi lam hla tak aṭanga phurh thlen ngaite an ni ṭhin a, a bunna turah mamawh dang tam tak a lo ṭul ṭhin nen, chawpchilh leh rang taka thil kal pui a har chang a awm a, hei hi mipuiten min hriatpui a ṭul hle a, sawrkar hmalakna a nih vang ngawtin thawkleh khatah thil a tih fel rum rum theih vek bik lova, hun kan mamawh thin a ni, a ti.
Dr. R.Lalthangliana chuan sawrkarin hri dona kawnga hma a laknate chu hripui lên lai leh a reh hnu pawha kan ramin khuarei thlenga a ṭangkaipui tur a tam hle tih a sawi a, District tina RtPCR dah turte leh, Serchhip leh District danga hawn mek Oxygen khawlte leh hmalakna dangte chu hripui a reh hnuah pawh an ṭangkai chhunzawm hle zel dawn tih a tarlang a ni.
Minister chuan, PM Cares Fund atanga din district hrang hrang leh ZMC leh Cancer Hospital, a vaiin khawl thar 14 zingah Prime Minister zahawm takin Serchhip Hospital ami a hawn atana a rawn thlang chat mai chu ropui a tih thu a sawi a, Mizoram hmun hrang hranga PSA Oxygen Plant hawn thar 14 te Oxygen siam theih belhkhawm chu 6550 Litres per Minute (lpm) zet a nih thu a tarlang bawk.
Hripui len hnuah ZMC ah damlo Khum nasa taka tihpun a ni tawh a, ICU 13 chauh awm thin pawh 34 ah tihpun niin, Aizawl Civil Hospital ICU pawh nasa taka tihlen niin kuminah la tihlen belh leh tum a ni a, heng kan ICU te hi tunlai khawl thar tha ber berte nena thuam an ni. Mizoram sawrkarin Health Infrastructure tihhmasawnna lama hma a lakna te chu a lian hlawm hle a. World Bank aṭangin cheng vaibelchhe 280 hmuh a ni a, chu chuan Mizoram Health Infrastructure Strengthening thawh chhoh ṭan mek a ni a ti a, Japan International Funding Agency aṭangin cheng vaibelchhe 500 hmu lehin, chu chuan Cancer Superspeciality Hospital din a ni dawn tih a sawi bawk a.
He hun hi Dr. Lalnunhlima Khiangte, DMS charge la mektuin a kaihruai a, Covid-19 hripui len hma chuan Serchhip District Hospital hian Oxygen hi a burin Aizawl lama mi an phur mai ṭhin a, thla khatah vawi thumte an kal ṭhin tih a sawi a, hripui len hnuah 80 Litres per Minute bun a ni a, chu chuan nasa takin a chhawk a, tuna 250 Litres per Minute hawn a ni ta chuan mamawhte a phuhruk ṭhat hle an beisei tih a sawi a, nimina hawn tak 250lpm PSA Plant chu a khawl ni 19 September, 2021-ah a rawn thleng a, chumi thla vek ni 25-ah hman theihin bun fel a ni a, khawl bun fel ran theih nan bawrhsap Kumar Abhishek leh P&E lama thawktute an hah hle tih sawiin, a bun zo fel hmasa an nih avang hian PM Office hian virtual-a a hawn zinga tel turin a rawn thlang anih te pawh kan ring a ni, tiin hma an lak dan tlangpui a sawifiah a ni.
He hunah hian bawrhsap Kumar Abhishek, IAS chuan lawmthu sawiin a khar a, Prime Minister virtual Programme chu zawm zui nghal a ni.
Prime Minister virtual inauguration neih a nih zawh hian Dr. R.Lalthangliana chuan Serchhip Bazar building tihzauhna hnathawh (extension) a tlawh leh a, Minister hi R.Lalramnghaka, Secretary, Health & Family Welfare leh T.Lalhmangaihi, Director, DHME ten an rawn zui a, Serchhipa Health & Family Welfare a thawktute leh sawm bik officer leh media mi ṭhenkhatte an tel a ni.
Nimina Serchhip ruala Mizorama PSA Oxygen Plant hawnte
- Chief Minister Zoramthanga chuan Mizoram State Cancer Institute (MSCI), Zemabawkah a hawng.
- P&E Minister R.Lalzirliana’n District Hospital Saitual-ah a hawng.
- District Hospital, Kolasibah Kolasib DC Dr.H.Lalthlangliana’n a hawng.
- Siaha-ah Abraham Beirazi Khithie, Additional Deputy Commissioner kaihruaiin hun hman a ni.
- Rural Development, etc. Minister Lalruatkima chuan DCHC, Kulikawn Hospital, Aizawl-ah a hawng.
- Dr. Lalrozama, IAS, District Bawrhsap chuan District Hospital, Mamit-ah a hawng.
- Health & Family Welfare Board Vice Chairman Dr. Z.R Thiamsanga, MLA, Champhai North chuan District Hospital Champhaiah a hawng.
- District Hospital Hnahthial-a bun chu Hnahthial District Additional Deputy Commissioner Saizikpuii’n a hawng.
- District Hospital Lawngtlaia bun chu Lai Autonomous District Council (LADC)-a Chief Executive Member (CEM) V. Zirsanga’n a hawng.
- SRHF-ZMC-a mi chu AMC Mayor Lalrinenga Sailo-i’n a hawng.
- District Hospital Khawzawla mi chu Khawzawl District Bawrhsap CC Lalchhuangkima’n a hawng.