Postal Deparment buatsaih “Special Cover on Darthawma Renthlei” leh “Freedom Fighter Darthawma” tih lehkhabu Familia Fanai Laltansanga ziak chu nimin khan Dr.Vanlalṭanpuia MLA, Mizoram Youth Commission Chairman chuan a tlangzarh.
Tlangzarhna inkhawm Convention Centre Lungleia neih hi Lalrinzuali Inspector of Posts Lunglei Sector-in a kaihruai a, Pu KT.Sailo Superintendent of Posts Mizoram Division chuan kalkhawmte lawmna thu a sawi a ni.
He huna khuallian leh Special Cover leh Lehkhabu tlangzarhtu Dr.Vanlalṭanpuia chuan khawvelah hian mitin in kan duh chu zalenna a ni Dr.Vanlaltanpuia chuan tiin, India ramin zalenna a neih theihna tura beitu Indian National Army zinga kan Mizo Pa Darthawma a lo tel ve chu a ngaihsanawmin a chhuanawm a ni a ti a, tun hmain India ram hi khawvela ram dang chi hrang hrangten an lo awp ṭhin a, British-in kum 200 vel India a awp chhung khan India ram hausakna tam tak an lachhuak a, anmahni ramah nasa takin an thawn lut ṭhin a ni a ti. Bristish-ho hnuaia India mipuite kan kun ngawih ngawih duhlo a beitu INA-te lo piangin zalenna awm theihna turin theihtawpin thi leh thau pawlhin an suala vawiina zalen a kan awm ta hi an sual chhuah a ni a ti. Vawiina zalenna kan neih theihna tura beitu mi huaisen te zingah mizopa Pu Darthawma a lo tel ve hi a chhuanawm in a ngaihsan awm hle a, an inpekna leh an huaisenna avanga vawiina India lo ni ta hi a awm a ni tiin, thangthar zawkte pawhin ngaihhlut nachang kan hriat a pawimawh a ni Dr.Vanlaltanpuia chuan tiin ram hmangaihtu British hnuai atanga min chhanchhuaktu Pu Darthawma pawh mizote thinlungah leh India sawrkar thinglungah a nung reng tawh ang a ti.
India ramin zalenna a hmuh kum 75- na champha pualin India sawrkar chuan Ministry of Communication, Department of Posts kutah nimin khan Special Cover te tlangzarh turin a ti a. Mizo te zinga India ram tana zalenna lo sualtu Azad Hind Fauz, Darthawma Renthlei ( L) chu a thlang ta a ni.
Darthawma Renthei (L) hi kum 1920 khan Pukpui khuaah a piang a. November ni 27, 1940-ah British Army a zawm a, kum 1941 khan Malaysia a thawn zingah telin kum 1942 khan Japan leh British sipaite chu Prisoner of War ah man niin, Darthawma pawh hi a tel a ni. Jail atanga a chhuah hnuin Indian National Army a zawm a, man niin kum 1946 ah chhuah zalen a ni. India ramin zalenna a hmuh hnuah Freedom Fighter of India ah pawm a ni a, India zalenna sualtute tana siam Tamrapatra Award chu chu August ni 15, 1973 khan hlan a ni bawk. Darthawma Renthlei hi Lunglei Chanmari-ah a nupui fanaute nen chengin July ni 21, 2019 khan a boral a, Darthawma Renthlei puala India ram sawrkar, Ministry of Communication in Special Cover a siam hi Aizawl Dak Inpuiah lei theihin a awm dawn a ni.