Virtual Anthurium Festival hman dan tur rel

Nimin khan Tourism Minister Robert Romawia Royte hovin a pisaah sawrkar mi pawimawhten kumina Virtual Anthurium Festival hman dan tur an rel.

Minister chuan Anthurium Festival chu kum tin ropui taka buatsaih ṭhin nimahse kum kalta aṭangin Mizoramah Covid-19 hripui a len tak avang leh sawrkarin inkhuahkhrihna a kalpui chhoh tak zel avangin mipui nawlpui nen a huhova hman a rem ta lo, a ti a. Kuminah pawh virtual-in, tv leh internet kaltlangin he festival hi hman a ni leh dawn a ni, a ti.

Tourism tihhmasawnna turin sawrkar laipui chuan kumtin festival hmanna tur sum leh pai State te hnenah a pe thin a. Anthurium Festival pawh hi chutianga sawrkar laipui aṭanga sum hmuh hmanga buatsaih ṭhin a ni a. Hmasawnna hna thawh nan emaw, COVID19 do letna atana hman leh pawh pen theih a ni lo a. Tourism tihhmasawnna atan bik liau liau Sawrkar Laipui chuan State te hnenah sum a pe chhuak thin a ni.

Meeting chuan Covid Appropriate Behaviour (CAB) leh sawrkar inkaihhruaina dangte zawm chungin kumin Anthurium Festival chu Aizawl Vanapa Hall-ah October ni 28 leh 29 hian neih ni se, tiin a rel a. Cable TV leh social media platform hrang hrang – facebook, youtube leh a dangteah mipui thlir theih turin live in pek chhuah a ni ang. A hman dan tur kim chang duang turin vawiin meeting chuan Programme Committe a din nghal a. Virtual Anthurium Festival Programme Committee Chairman atan Tourism Secretary ruat niin Member Secretary atan Tourism Director chu ruat a ni bawk.

Leave a Reply

This site uses Akismet to reduce spam. Learn how your comment data is processed.