Editorial: Thlasik thlai chingtute an tlai loh nan sawrkarin hma laksak thuai se

Tunhnaia ruah sur nasa leh tuilian chuan Mizoram hmun hrang hranga leilet neitu leh thlai chingtute tan harsatna a siamsak mek a, leilet neitu tam tak chuan an buh seng mai theih turte an chân nasa hle a, hetihrual hian thlasik thlai chingtute pawh an thlai chin bulṭan tawhte nasa takin a tihchhiatsak bawk a, kuthnathawktuten rim taka hna an lo thawh tawhna engmah loa a chang ta mai hi a pawi a, kuthnathawktute an khawngaihthlak hle a ni.

Hetiang khuarel chhiatna tawktu kuthnathawktute chhawmdawlna tur hi sawrkar pawhin a la ruahmansak ngei turah ngai ila. Leileta buh chingtu, ruahsur leh tui lianin a tihchhiatsakte hi chuan an chân tur ang leh an tawrh tur angte an tawrh zawh tawh avangin a thara hmalakpui nghal ngaihna an awm tawh rih lova, sawrkarin engemaw kawnga chhawmdawlna a siamsak mai loh chu hmalakpuina tur a awm thei vak tawh lo niin a lang.

Hetihlai hian thlasik thlai chin bulṭan mek kuthnathawktuten sum tam tak senga thlai chi an lei, ruahsur leh tuilianin a tihchhiatsakte hi chu ngaihven zui nghal an ṭul hle a, thlai chin chu hunbi nei thil a ni a, hma an lak leh theih veleha thlai an chin leh nghal mai loh chuan an thlai thar thlengin a nghawng thei dawn a, hetihlai hian kuthnathawktu ṭhenkhat tan chuan an neih ang anga thlai chi an lei sate a riral tak avangin thlai chi dang ngaihtuah leh pawh an tan thil harsa a ni thei tawh a, heng miten thlai chia harsatna an neih avanga thlai chin an khaw tlai lohna turin sawrkar lam pawh hian a rang lamin hma lakpui thuai thei se a duhawm khawp mai.

Leave a Reply

This site uses Akismet to reduce spam. Learn how your comment data is processed.