Zothlifim Logo
Loading ...

Education Minister Lalchhan-dama Ralte chuan New Education Policy tipuitling turin mithiam ṭhiau telna committee hrang hrang din a ni a, he’ng ruahmanna hmang hian Mizoram chhungah zirna tha zawk neih theih thuai beisei a ni a ti.

Inrinni khan Gauhati Medical College & Hospital Auditorium, Bangagarh-ah India Hmarchhak State Education Minister-te ṭhutkhawm North East Education Conclave neih a ni a, Union Education Minister Dharmendra Pradhan chu khuallian a ni.

North East Education Conclave-ah hian Lalchhandama Ralte chuan Mizoramin zirna lama hma a lak dan leh hma a sawn dan bakah mamawh hrang hrangte a tarlang a. Chu’ng zingah chuan Sawrkar laipuiin Zirna kalphung thar ‘New Education Policy'(NEP) 2020 hman tura a chhawp chhuak chu lawmawm a tih thute, NEP 2020 kalpui tura hmalak dan tur chi hrang hrang – hun awh rei leh rei lo chi ruahmanna siam a nih bakah zirna lama mi thiam ṭhiau telna Committe hrang hrang din a nih thu te leh heng ruahmanna hmang hian Mizoram State chhungah zirna tha zawk neih thuai beisei a nih thu a sawi a ni.

Minister chuan Sawrkar laipui hmalakna peng hrang hrang Nipun Bharat, Ek Bharat Shreshtha Bharat, Fit India, Swachh Bharat Swachh Vidyalaya, Covid-19 Campaign leh Constitution Day a kalpuite chu lawm-awm a tih thu leh Samagra Shiksha Scheme hnuaiah hmun kilkhawr zawka chengten zirna an ban phak nana Netaji Subhash Chandra Bose Avasiya Vidyalaya a kalpui chu thil lawmawm tak a nih thu a sawi a.

Hemi rual hian Zirna lama hmarchhak state hrang hrangte harsatna leh mamawhte tarlang telin Minister chuan Right to Education (RTE) Act, 2009 Section 7(3)-in a tarlan anga Sawrkar laipuiin State Sawrkar-te sum mamawh a pek dan tur ruahmannaah state sawrkar nena indawrtawnna hun a bichilh avangin Samagra Shiksha Scheme hnuaia zirtirtu leh Teacher Educator-te hlawh tur Sawrkar laipuiin a ruahman chu zaa 50 dawnin a tlahniam a, hei hian state sawrkar tan harsatna namen lo thlenin sawrkar hmalakna thar tam tak pawh a kalpui mumal thei lo a ni, a ti a. Samagra Shiksha kalphung thar hnuaiah State sawrkar te rawtna-in ngaih pawimawh a hlawh tawk loh avangin Zirlaibu a thlawna sem kawngah te, school uniform a thlawna pekna-ah leh Zirlai chawl tawh Secondary school lama kaitir tura sum ruahman pawh a beitham em avangin hma lak a harsat thu te, Primary School zirtirtu indaih lohna te leh ICT hmanga zirna kalpui turin network connectivity rintlak a tul thute, Pre-School kalpui turin Department dang nena a inthuaha hma lak a nih loh na’n kum bithliah tih fel a tul thute a sawi bawk.

Minister hi School Education secretary Dr. Lalzirmawia Chhangte leh Samagra Shiksha State Project Director, Lalhmachhuana-te’n an ṭawiawm a ni.