Zothlifim Logo
Loading ...

Nimin khan Mizo Zirlai Pawl (MZP) hruaitu tharte chuan Aizawlah thuthar thehdarhtute an kâwm.

MZP President thar Lalnunmawia Pautu chuan MZP chu zirlai pawl a nih angin zirna an ngaih pawi-mawh ber dawn thu a sawi a, an hmalakna tur hrang hrangte tarlangin CADC huamchhunga awm Zofate Chawlhbuk -Borapansury-a mi Mizo sumdawng leh zin veivak tena chawlh hahdam nana an hman ṭangkai em em ṭhin chu a remchang hmasa bera tlawh an tum thu an sawi a. Tunhnaia NABARD pawisa puka, Mizoram School Education Department-in thing-tlang sikul tihchangtlunna tur hna an thawh mekah thil felfai lo tam tak awma an hriat thu sawiin, a chhuizui turin Committee an din thu leh, MZP Hqrs, Sub-Hqrs, Branch leh Hnampual hruaitute pawh an huam-chhunga sikulte lo endik a, lo chhuizui turin hriattîrna an tichhuak tawh a, tunkar chhungin report ṭheuhte chu Gen. Hqrs.-ah an thehlut ang a, a ṭul angin hma an lak zel tur thu an sawi bawk.

November ni 24 tlai dar 4 thlenga zirlaiten Scholarship 2nd Installment an la dawng lo a nih chuan Chief Minister Bangla kawtah lungawilohna lantir an tum thu an sawi a, tun scholarship second installment atan hian sum cheng Vaibelchhe 13 chuang sem tur a awm niin an sawi bawk.