Nimin tlai khan Health Minister Dr R.Lalthangliana chuan Regional Institute of Paramedical and Nursing Sciences (RIPANS), Zemabawk tlawhin sawrkar laipui aṭanga RIPANS tihchangtlunna tur project hmuh hmanga hnathawh kalpui mek a hmunah a enfiah.
RIPANS tihchmasawnna leh tihchangtlunna atan hian sawrkar laipui chuan cheng vaibelchhe 480.12 a ruahman a, heta ṭanga cheng vaibelchhe 217 hi building hrang hrang sakna tur niin, a bak zawng hi PG Course 7 hawn thar belhna tur leh thawktu mi thar 154 lâkna senso leh hlawh tur a ni a, heng thawktu thar lâk pawh hi sawrkar laipuiin a phalsak vek tawh a ni.
RIPANS a building sak mekte hi Academic Block-IV chhawng 5 a sang, Auditorium mi 1000 len theihna, Guest House pakhat – bedroom 8 leh suite 2 awmna, PG zirlaite awmna tur General Hostel room 168 awmna, khum 100 awmna Hospital tunlai khawl changkang ber ber hmanga thuam tur, Resident Doctor-te chênna tur quarters 22, Staff/Nurse quarters 18 an ni a, hna hi kum 2021 March ni 1 aṭanga thawh ṭan niin, ruahman ang chuan thla 24 chhunga zawh tur a ni a, amaherawhchu hripui leng vanga harsatna hrang hrang tawh a nih vangin a hun takah hi chuan an zo fel hman dawn lo niin contractor te hian an sawi a ni.