Nimin chawhma dar 10 khan MJA Gen. Hqrs. president Zonunsanga Khiangte chuan kea Mizoram fan-chhuah tuma chhim lam pan leh tur, Lalbiakthanga, kum 64-na hmang mek chu Sikulpuikawn aṭangin a vailiam.
Zonunsanga Khiangte chuan Lalbiakthanga’n thuchah hrang hrang – hnam inpumkhatna, thih hnua midangte tana mit pêk a pawimawhna, tuihna leh nungcha humhalh pawi-mawhnate thehdarh pah zel tura ke ngata Mizoram fan chhuah a tumna chu ropui a tih thu sawiin, Lalbiakthanga chu a kal zelna turah Pathian hruaina leh awmpuina dawng zel turin duhsakna a hlan a, a tum hlen chhuak thei ngei tura hriselna ṭha nei zel tura duhsakna a hlan bakah, Lalbiakthanga’n thuchah hrang hrang a kente chuan rah ṭha tak chhuah ngei se an duh thu MJA President chuan a sawi bawk.
Sailulak khawchhuak, tuna Lawipu Veng Aizawla awm Lalbiakthanga hian kea Mizoram fangchhuak turin February ni 9, 2022 khan Vairengte aṭangin a ṭan a, Kolasib tlangdung a fan hnuah Bairabiah lêt thla lehin, Bairabi aṭang hian Mamit tlangdung a fang a, Reiek aṭanga Aizawl lûtin, Mizoram chhim lam fang turin a thawk chhuak leh ta a ni. Zan a riahna tur khua-ahte chuan VC-te a belbul deuh zel a, a thuchah kente sawiin inkawmkhawmna hun an nei ṭhin a ni.