Food, Civil Supplies & Consumer Affairs Minister K. Lalrinliana chuan Mizoram hmun tam taka kawng sial mek a nih avangin kum danga kudam 50 vela fur daih tur buhfai chhêkkhâwl chu kuminah chuan kudam 70 velah Monsoon Stock dah a ngai dawn a tiin hei hi dah mek a nih thu a sawi.
Nimin khan Supply Minister hian Hmuifang leh Chhipphir-ah Department hmalaknaa NABARD loan hmanga sak thar Supply Centre – Kudam leh Quarter-te a hawng a, he hunah hian thusawiin, an sawrkar ṭan tirha Department mawhphurna a lâkin Supply Kudam tam tak chhe tawh lutuk leh a hul ṭhat loh avanga buhfai chhe ṭhin chu ngai mawhin a sak ṭhat dan kawng hrang hrang a dap dante a sawi a, chung kudam sak ṭhat ngai 65 aṭangin 10 sakna tur chu kum 2019 khan Central sawrkar aṭanga hmuh a nih thu te, a bak 21 sakna chu NABARD loan aṭanga sak mek a nih thu te a sawi.
Thla tin sawrkarin mipui hnenah buhfai quintal 1,05,000 vel a sem ṭhin thusawiin BPL, AAY bakah Scheme dangte pawh a awm, Open Market Price aṭangin engemaw zat lei a nih thu a sawi a, sawrkar chuan Mizoram tharchhuah buhfai chu OMP-a lei a duh vek a, mahse lei tur an hmu mang lo tih sawiin, kan ei tur buhfai kan la tharchhuak tlem lutuk hi a lungchhiat thlak a, ṭan lakna tur a tam hle a ni, a ti a, Vietnam-ah pawh tlangram chhengchhe tak taka terrace siamin buhfai an tharchhuak tam a, Mizoramah pawh kan tum chuan kan theih loh thu a awm lo a ti a, Oil Depot hmun turte leh LPG Bottling Plant tihlente chu sawkarin a ngai pawimawh tiin, hma a lak dante a sawi bawk.
Hmuifang Supply Centre-ah hian cheng nuai 140 vel sengin buhfai Metric Tonne 200 dah theihna Kudam bakah Store Keeper leh Chowkidar Quarters Building (chawng hnih) sak a ni a, Chhipphir Supply Centre pawh hetiang tho a sak a niin a sakna man hi cheng nuai 156 vel a ni.
Supply Department hian Mizoram pumah Supply Centre 121 an nei mek a, chung zinga 21 chu sakṭhat mek a ni a, a sak hna thawk-tu hi Babie Construction & Consultancy Services niin, a project pumpui hi cheng vaibelchhe 39.61 hû man a ni a, kudam tam zawk chu March 2022 ral hmain sak zawh an beisei a ni.