Nimin khan Serchhip Sailiamkawnah dân phalloh bungrua leh ruihhlo tawlhte enfiahna tur, Police Check Post sak thar chu Serchhip SDPO Kaste Romalsawma chuan a hawng a, nimin aṭang khan Police-te an duty ṭan nghal a ni.

Serchhip Sailiamkawn-a Police Check Post hawnna inkhawm tawi hi Kaste Romalsawma SDPO chuan kaihhruaiin, Serchhip Sai-liam Kawna Police Check post din chhoh a nih dan tlangpui a sawi a, he hun rawn hmanpuitu, Central YMA President R.Lalngheta chuan Sailiamkawn Police check post chu Mizoram leh hnam tana hmun pawimawh a ni tiin, Sailiamkawn check post chu rintlak leh ṭangkai tak a nih ngei a beisei thu a sawi a, Police-te tha tichak tura YMA-te an awm reng thu te, Cental YMA ngenna anga Mizoram sawrkarin February thla chhunga check post thar pahnih a peihfel ta chu CYMA hming-in lawmthu a sawi bawk.

Check post thar sak dan report petu, Serchhip SP Office-a Reserved Officer, Inspector H.Biakchhuma chuan helai hmuna Check Post siamna tur hian PHQ Assistant Inspector General (AIG) II P&L hnuaia aṭanga cheng nuai 5 hmuh a nih thu sawiin, nikum October ni 18 aṭanga Departmental Works-a ṭan a nih thu a sawi.

Serchhip Sailiam Kawn a Police Check Post siamna atan hian Serchhip Dinthar VC te chuan ram pe in,A ban bul hi RCC hmanga siam niin Assam Type-a chhun-zawm a ni a, a dung leh a vang ft. 18 ve ve niin nitin darkar 24 chhungin thawktu mi 4, Havilder pakhat leh Constable pathumten an awmchilh ṭhin dawn a ni.

Serchhip Sailiam Kawn a Police Check Post hawn-naah hian CYMA hruaitute bakah Serchhip Sub Hqrs YMA leh Darnam Branch YMA hruaitu ṭhenkhatte bakah thuthar lakhawmtu ṭhenkhatte an tel a ni.