Chief Minister’s Office chuan tunhnaia chanchinbu ṭhenkhata Assam CM leh Mizoram CM zanriah an kil thu an tarlan chungchangah thu dik tawk lo a awm tiin, sawifiahna a siam.
CM Office-in sawifiah-na a siamah chuan, tunhnai-ah chanchinbu ṭhenkhat leh social media-ah ni 25.11. 2021 zana Assam Chief Minister Himanta Biswa Sarma leh Mizoram Chief Minister Zoramthanga-ten New Delhi-a zanriah an kilho chungchang thu tarlan a ni a, hemiah hian thu dik tawk lo ṭhenkhat a awm tih a tarlang a.
He zanriah hi Mizoram Chief Minister-in a buatsaih anga ziah a nih laiin Assam Chief Minister-in a buatsaih a ni zawk tih tarlangin, ani sawmna angin New Delhi Assam House-ah zanriah hi Mizoram CM hian a va kilpui tih a tarlang a, hemi ṭum hian Chief Minister Zoramthanga hi Delhi Mizoram House Resident Commissioner te, Officer on Special Duty to CM leh Addl. PS to CM-ten an ṭawiawm a, anni bak hi hemi ṭum hian amah ṭawiawmtu an awm lo a, Mizoram CM sawmna anga Abu Mazumdar-in a ṭawiawm tih chu thu belhchiandawllo a ni a, ani hi Assam CM lamin an sawmna anga he dinner ah hian lo tel ve a nih a rinawm, tiin tarlan a ni. Abu Mazumdar hi Assam Police-ten kuhva tawlhru ṭhin anga an rinhlelh mek a ni.