Chief Minister Zoram-thanga chuan Mizoram state puitling a nih kum 35-na nimin khan Zoram mipui chibai bukin duhsakna a hlan.
Mizoram State Day thuchah sawiin, Chief Minister chuan kum 1986-ah Mizoramin inremna a nei a, kum 1987-ah State neiin February ni 20, 1987-ah state-a puan a ni a ti a. State satliah ni lovin inhumhalh bikna nei state puitling a ni a, nimin kha a champha vawi 35-na a ni a ti a, State pawh a lo upa ve ta hle a, a lawmawm a ni a ti bawk.
Nimin kha Chawlhni a nih avangin State Day puala inkhawm neiha thildang tih a rem loh thu a sawi a, Chief Minister chuan ni ropui a nih theihna turin lawmawm tia min duhsaktu pawh Mizoramin a neih thu a sawi a, President, Prime Minister, Union Minister-te leh ṭhian ṭha dangte hnen aṭangin duhsakna leh lawmpuina a dawn thu a sawi bawk a ni.
Kum 1966 March ni 1-a MNF te’n India sawrkar laka zalenna an sual avangin kum 20 chhung zet chu Mizo-ram chu rambuai a puan a ni a, mipui tawrhna nasa tak a thlen hnu-ah MNF ramhnuai sawrkar hruaitute leh sawrkar laipui chu kum 10 zet inbia-in kum 1986 June ni 30 khan ‘Mizo Accord’ ti a an sawi Inremna thuthlung chuan MNF, sawrkar lapui leh Mizoram UT sawrkar aiawh-te’n New Delhi-ah an ziak a, he inremna thuthlunga pawm tlan angin Mizoram UT chu state puitlingah hlan kai a ni a, khatihlai a Prime Minister Rajiv Gandhi khan Aizawla Assam Rifles lammual-ah state puitling nihna hi a rawn puang a ni.