Nimin khan ZPM party chuan Mizoram sawrkar Power & Electricity-in electric bill 21.05% a tisang tura JERC a rawtna a thlen chungchangah complaint a theh lût.

ZPM chuan Mizoram sawrkarin power leina station 4-ah rate sâng bika a lei chu a tlâwm zawka lei dan ngaihtuah se, tiin, power leina ₹7.36 per unit a nih laiin, kan hralh ve hian ₹3.47 per unit a ni thung a, chuvângin trading chungchang hi zirchian ni bawk se an ti a, Electricity Act 2003-in a sawi angin Generalisation, Transmission leh Distribution thliarfel hmasak ni se, sawrkar chu tariff tihsan aiin subsidy siam tûrin an phut tih an sawi bawk.

ZPM aiawha lehkha thehluttu PC Vanlalruata, Secretary General chuan, sawrkarin mipuite harsatna siam zawnga electric bill tisang tura ruahmanna a siam chu hriatthiam har an ti hle tih sawiin, nikumah pawh ZPM chuan na taka sawiselin tihniam tûrin theihtawp a lo chhuah tawh tih a sawi a, kum khat pawh a ral hma a a ngai ang bawka bill tisang tura sawrkarin hma a la leh nghal mai chu an dem thu a sawi.