Zothlifim Logo
Loading ...

Mizoram Larsap Hari Babu Kam-bhampati chuan nimin khan Raj Bhavan-ah Mizoram Post Office hotute a kâwm a, Mizoram chhunga an hmalaknate zâwtin thingtlangmite tan Bank ang chiaha hna thawh theih dante nasa zawka zirtirna pe turin a chah.

Larsap chuan Mizo-ramah Dak In hnathawkten ṭha tak leh ṭangkai taka hna a an thawk chhunzawm chu lawmawm a tih thu a sawi a, Mizoram hmun tinah Dâkin a awm deuh vek avang leh Digital Technology ṭha taka hmang department an nih angin mipui tan an pawimawhna a sâng em em a, tunah chuan Postal Service chu lehkha, bung-rua leh pawisa inthawnna chauh a ni tawh lova Bank lian tak an ni tel tawh a ni a ti.

Tunah hian Mizoram hmun kilkhawr tam zawka chêngte tan Bank pan a la harsa hle a, a darh zau ber, Mizoram Rural Bank pawhin a la tuamchhuak hneh lo hle a, hetihlai hian Post Office chu hmun tin deuh thawah a awm bakah, a awm lohna khua aṭanga pan awlsam tak a ni vek a, Post Office-ahte hian saving account-te cheng khatmah dah ngai lovin a hawn vek theih zui a, Post Office-a Bank Account hi Bank pangngaia account nen a tih theih a inang deuh vek tawh bawk a, he thil hi Bank awm lohna hmuna chêngten an hriat a ngai a, ṭangkai taka hman a nih theih nan Dak Ina thawkten mipui zirtirna kawngah ṭan an lâk nasat a ngai a ni a ti.

Central sawrkar aṭangin ṭanpuina Scheme ṭha tak tak a awm ṭeuh a, hemi kaltlanga pawisa Beneficiary-ten an dawn turte chu DBT hmangin an account dah deuh vek a ni tawh a, chuvangin, bank awm lohna hmuna chêng beneficiary-te tan chuan insengso ṭeuha Bank awmna pan aiin an awmna bul hnaia Post Office account hawn an intihhmuh a ngai a ni a ti.

Post Office-in a kalpui te – Sukanya Samriddhi Account (SSA) – hmeichhe naupangte puala bank account nu leh pa te hawnsak turah pawh Post Office-a thawkte ṭan an lâk nasat a ngai tih a sawi a, Post Office-a account nei lo tan pawh thingtlang khua Bank ATM awm lohnaah Aadhaar Enabled Payment Systems (AEPS) – Aadhaar ATM ṭangkai takin an hmang thei a, Bank Account neite tan Aadhaar Card hmangin heng thingtlang khua ATM awm lohnaahte hian Post Office-ah pawisa ₹15,000/- thleng an la chhuak thei tihte pawh hi hre lo tam tak an la awm a, hemi chungchanga leh Post Office-in a kalpui sum peipunna scheme ṭha tak takte hi mipuiin kan hriat a ngai a ni a ti.

He hunah hian T.Mangminthang, Postmaster General, NE-I chuan Post Office-in Mizoram chhunga hna a thawh tlangpui a sawi fiah a, Lalnuntluanga, BM, IPPB, Aizawl chuan Post Office-in Bank an kalpui dan a sawi bawk a ni.

Report-a tarlan a nih dan chuan tunah hian Head Post Office, Aizawl hnuaiah Mukhya Dak Ghar pakhat, Sub Post Office 38 leh Branch Post Office 347 a awm a, thawktu officer leh staff pangngai 175 bakah Dak pu (Gramin Dak Sevak) 990 an awm mek a. Mizoram chhunga post office zawng zawngte chu Core Banking hmanga thlunzawm vek a ni tawh a, thingtlanga post office-ahte pawh Digital Advancement of Rural Post Offices for a New India (DARPAN) hman a ni tawh a ni.

Post Office chhunga bank – India Post Payments Bank Ltd (IPPB) hnuaiah hian Bank hnathawh ang Savings Bank, Recurring Deposit, Monthly Income Scheme, Time Deposit, Public Provident Fund, Senior Citizen Savings Scheme, NSCs leh KVPs-te kalpui a ni mek a, tunah hian Mizoram chhunga Post Office hrang hrangah Account hawn theih vek ni tawhin account 2,13,219 enkawl mek a ni a, Pawisa pek chhuahna RTGS, NEFT, IMPS, UPI, Aadhaar Enabled Payment Systems (AEPS) – Aadhaar ATM, etc kaltlangin a kalpui mek a, heng bakah hian insurance policy hrang hrang a kalpui mek bawk a, NREGS, PM Kisan Yojana, PM Awas Yojana, PM Ujjwala Yojana leh Students Scholarships-ah te pawh DBT a kalpui mek a ni.