Serchhip Ṭhalai Pawl (SṬP) chuan Serchhip District Hospital Building thar tur chungchangah thuchhuah siamin,Serchhip Town NGO Coordination Committee-in ruahmanna an lo siam tawh, Bukpui rama damdawi building thar sak an duh thu an sawi.
SṬP chuan nimina thu-chhuah an siamah Serchhip District mipuiten an mamawh em em Serchhip District Hospital sak ṭhatna tur chu Distict Bawrhsap kal chhuak ta Kumar Abhishek leh sawrkar hotute hma lakna avangin, PGCIL chuan CSR fund aṭangin Serchhip District Hospital khum 100 awm theihna sakna tur cheng vbc. 21 chu a rawn pe dawn ta tih hriat a nih thu an tarlang a, hetianga damdawi in sakna tur sum a awm tur hi lawmawm an tih thu sawiin, hemi kawnga hma latu leh vei em emtu District Bawrhsap kal chhuak ta Kumar Abhishek chung-ah lawm thu an sawi a ni.
He CSR Fund hi Serchhip District Hospital khum 100 awm theihna tur sakna atana hman thuai a nih theih nan, Company lam nen MoU te sign-a hma la thuai turin sawrkar an ngen tih an sawi a, hetihlai hian District Hospital sakna hmun tur chungchangah hian a hma lama NGO Co-Ordination Committee ten ruahmanna an lo siam tawh, Bukpui ram chu Serchhip Ṭhalai Pawl chuan ṭha an tih thu sawiin, nakin zela kan khaw ṭhan zel dan tur ngaihtuahin, helai hmuna Hospital lian awm hi a ṭha hlea an hriat thu an sawi a, Serchhipin Damdawi in changtlung tak a neih thuai theih nan, a rang lama hma la turin sawrkar hotute an ngen tih an tarlang bawk.