Siaha khawpui aṭangin Ramdaidep chi (species) thar hmuh chhuah a ni. Siaha hmingchawiin Crytodactylus Siahaensis tia vuah a ni.
Developmental Biology & Herpetology Laboratory, Department of Zoology, Mizoram University a Head of Department ni mek Prof. HT Lalremsanga leh a thawhpuite chuan Siaha, Palak National Wetland leh a chhehvel ramhnuai a amphibians leh reptiles-te an zirchiannaah, an pian-hmang (morphology) leh chifang (DNA) aṭangin Ramdaidep, Cyrtodactylus (Bent-toed Gecko) chi thar hmuchhuakin, a hmingah an hmuhchhuahna Siaha khawpui hmingchawiin a scientific name atan Cyrtodactylus Siahaensis tiin an vuah a. A common name atan Siaha Bent-toed Gecko tiin, a tualchhung hming (local name)-ah ve thung chuan Mara ṭawnga Ramdaidep sawina ‘Khotlia’ ti a vuah a ni bawk.
Prof H.T. Lalremsanga leh a thawhpuite tho hian Umroi Military Station, Meghalaya aṭangin Ramdaidep chi thar dang hmu chhuak bawkin, a hmingah Indian Army chawimawina atan Cyrtodactylus exercitus tiin an vuah ve thung.
Heng nungcha hmuhchhuah thar pahnihte chungchang hi February 18, 2022 khan International Scientific Journal, European Journal of Taxonomy vol.794 chuan a rawn tlangzarh (published) a ni.