Power Grid Corporation of India Ltd. (PGCIL) chuan Corporate Social responsibility (CSR) aṭangin khum 100 awm theihna tur Serchhip District Hospital building thar sakna atana cheng vbc. 21 an pawm-puina lehkha chu niminpiah khan Mizoram Chief Secretary hnenah an thawn.

Nimina PGCIL-in Chief Secretary hnena lehkha an thawnah chuan January ni 24 2022-a Serchhip District Commissioner hnen aṭanga lehkha an hmuh angin, kum 100 awmna tur Serchhip District Hospital sakna tura CSR Fund an dilna chu an pawm tih ziakin, inremna thuthlung ziak turin NERTS Shillong chuan a ṭul anga hma an lak mek thu an tarlang bawk.

Serchhip District Hospital building thar sakna tur hian District Bawrhsap kal ta, Kumar Abhishek, IAS, khan CSR aṭanga sum hmuh dan kawng a dap a, RTI zawhna chhânna aṭanga a landânin, cheng vbc.21 sengin tuna Serchhip District hospital building awmna ngaiah hian building thar sak tumin ruahman a ni a, hetihlai hian Serchhipa NGO Cordination committee leh town chhunga VC aiawh ṭhukhawmte chuan Bukpui rama hospital building thar hi sak nise tiin thutlukna an lo siam tawh thung a ni.