MNF sawrkarin dan leh thupek kenkawh chungchanga a hlawhchham avangin state sawrkar thuneihna lâksak turin BJP Mizoram Pradesh President Vanlalhmuaka chuan nimin khan Mizoram Governor Dr. Hari Babu Kambhampati a ngên.
Larsap hnenah ngenna a thehluhah Vanlalhmuaka chuan Mizoram sawrkar inrelbawlna fel loh avanga mipui leh ram hmasawnnain a tawrhna te, mipui chhia leh ṭha hriatna tihchhiata awm mek te, eirûkna leh dân loa sumdawngte (smuggler), dân pawisa lotute Mizoram state chhunga an huangtau lutuk avanga dân keng-kawhtute leh hmasawnna hnathawktute kut phuara awm mek te, state sawr-karin sawrkar laipui thupek a pawisak lohte a tarlang.
“Hetiang renga kan state sawrkar hi a kal chuan, Mizoram leh a chhûnga chêngte dinhmun chuan chhiat lam a pan tial tialin, ram leh hnam ang pawhin kan ṭhenawm state leh ringlo mite hmuhsit chu kan hma-bak mai tur a nih avangin, Mizoramah rorelna dik tun din a, dan leh thupekin awmzia a lo neih theihna’n,” tiin, larsap hnenah MNF sawrkar state thuneihna chu laksak turin a ngên a ni.
Larsap hnena memorandum a thehluh zawhah BJP State Office-ah thu thar thehdarh tute kawmin Vanlalhmuaka chuan, Mizoram state sawrkar, chief minister Zoramthanga kaihhruaiin an intiam ang leh ram dan (constitution) angin hna an thawk em tih enzui tura mipui hmaa an lo sawi ṭhin angin a takin Larsap hnenah memorandum an theh lut tih a sawi a, “RTI hmangin tunah chuan thil tam tak kan hotute hian an lam khawm tawh a. India ram dân leh mipui hmaa an intiamna pawisa lotute, mipui rawngbawl aia mahni sahmim puarna tur ngaihtuahna avanga dân palzûttute hi kan bei ṭan dawn chauh a ni,” a ti.
Mizoram State BJP President hian, MNF party kaihhruai sawrkarna hnuai-ah hian eirukna leh smuggler te, dan pawisak lohna a hluarin, tualcharah an inhrosa ṭan mek tih sawiin, “Dân pawisa lotuin dân a pawisa lo chu pawi a ti lo mai ni loin, he kan state-ah hian dân emaw a ti tawh zawk,” a ti a. State chhunga contract hna inpêk/thawh dânah MNF sawrkarin dân a pawisak lohzia chief minister berin a rawn puang tih a sawi.
Zawhna chhangin Van-lalhmuaka chuan Larsap chuan an ngennate chu uluk taka a lo zir tur thu sawiin, “Engkim hi dânin ka lo en vek ang a. ‘Dân hi a lal ber tur a ni’ tiin min hrilh a, keini pawh kan thla a muang,” a ti.
MNF sawrkar paihthlaa state-a President’s Rule puantir tum chu Mizoram state BJP hamṭhatna duh vang a ni em tih zawhna chu, “Keimahni hamṭhatna atana ti kan ni lo a. Tunah hian living opposition role kan play mek a ni. Kan tana hlâwkna tura hma kan lâk leh lâk loh chu mipuiin an la hria ang chu,” tiin a chhang.
President’s rule ngawr ngawr an ngen loh thu leh state sawrkar inrelbawlna fel lohna kawngah a te emaw, a lian emaw, dân anga hma la tur leh mipui chhan duhna vanga hma an lâk thu an sawi a. “President’s Rule hi kum khuaa puan tur a ni lo a. Sawrkar kalphung a fel lo leh state sawrkar nih vanga dân pawi pawisa loa mahni duh thu thua chet lâk theihna vena’n India danpui behchhana hma la kan ni zawk,” BJP Mizoram State hruaitute’n an ti bawk.